“Кураан сайын ойуур баһаардара күөдьүйэллэригэр төрүөт буолла. Буруо куораттары, сэлиэнньэлэри бүрүйэ сырытта, тыа хаһаайыстыбата улахан охсууну ылла – бу барыта биһиги төһө тулуурдаахпытын тургутан көрдө. Онуоха биһиги түмсүүлээхпитин көрдөрдүбүт, ыарахан кэмҥэ бары сомоҕолоһон, ааҥнаабыт алдьархайы кыайдыбыт”, – диэтэ Аҕа баһылыкпыт.

Кини ойуур баһаардарыгар бэлэмнэнии үлэтэ тохсунньуттан саҕаламмытын бэлиэтээн эттэ. «Экология» национальнай бырайыак чэрчитинэн баһаарга туһаныллар тиэхиньикэни ылбыттар. "Авиалесоохрана" үлэһиттэрин штатын элбэппиттэр. Хотугу сир намчы айылҕатын уоттан быыһыырга анаан Дьааҥы Баатаҕайыгар авиаотделениены тэрийбиттэр.

«Бастакы баһаар бу сайын Уус Алдаҥҥа ыам ыйын 11 күнүгэр бэлиэтэммитэ. Ол күнтэн ыла бэс ыйын 20-с чыыһылаларыгар диэри ойуур 150 баһаарын умулларбыппыт. Онтон бэс ыйын 22 күнүттэн, дьэ, уот элбэх сиринэн туран барбыта. Бэс ыйын 29 күнүгэр суукка иһигэр 98 баһаар тэҥинэн күөдьүйбүтэ. От ыйын 13 күнүгэр букатын да өрөспүүбүлүкэбитигэр 324 баһаар баара.

Ойуур баһаардарын бохсууга Арассыыйа 19 эрэгийиэниттэн тыһыынча кэриҥэ байыас кэлбитэ. Ону таһынан МЧС исписэлиистэрэ уонна байыаннайдара. 52 көтөр аал үөһэттэн уоту кэтээтэ, мониторинг ыытта, баһаары умулларааччылары таста.

Бу баһаардар, чахчы да, аар тайҕабытын көмүскүүр сэрии тэҥэ этэ. Киэҥ иэни куруҥҥа кубулуппут 509 баһаары бары сомоҕо күүспүтүнэн умуллардыбыт. 16 оройуон 46 нэһилиэнньэлээх пуунун суоһаабыт уоттан быыһаатыбыт. Билигин алта улууска уоту кытта охсуһа сылдьаллар. Онон сотору кэминэн ыксаллаах быһыы-майгы эрэсиимин уһулуохпут.

 Бэс Күөлүн чөлүгэр түһэрэр үлэ тэтимнээхтик барар. Атырдьах ыйын 20 күнүттэн дьиэлэри тутан саҕалаатылар. Баһаартан эмсэҕэлээбит олохтоохтор өрөспүүбүлүкэттэн уонна киинтэн көмө төлөбүрдэри ылаллар. Хотоннорун уонна тиэхиньикэлэрин уокка былдьаппыттарга СӨ Бырабыыталыстыбата 60 мөл. солк. ыытта. Үлэлиир мастарыскыайдара, сыахтара умайбыт урбаанньыттарга көмө эмиэ оҥоһуллар.

Баһаар буруотунан тыынан олорбут нэһилиэктэр оҕолорун соҕурууҥҥу лааҕырдарга ыытан сынньатабыт, улахан дьону санаторийдарга эмтэтэбит. Доброволецтар уопсастыбаннай ыстааптара туруорсан, баһаарга үлэлээбит волонтердар доруобуйаларын туругун эмчиттэр бэрэбиэркэлиэхтэрэ.

Бэс Күөлүгэр саҥа оскуола, элбэх хайысхалаах спортивный комплекс тутуллуоҕа. Бэрэсидьиэн Владимир Путин үбүлээһинин алтынны 1 күнүгэр диэри быһаарарга соруйбута. Кини дьаһалынан, эбии 24 миллиард солк. көрүллэр буолла. Ол үбү тыабытын, оппутун-маспытын баһаартан көмүскүүргэ туһаныахпыт.

Муниципальнай тэриллиилэр салайааччыларыгар нэһилиэктэрин баһаартан көмүскүүр үлэни ыытарга этилиннэ, минерализованнай балаһалары оҥоруохтаахтар..аха сирин ойуурун пуондата 10 миллион гектар сири ылар. Бу баайбытын “Авиалесоохрана” идэтийбит исписэлиистэрэ көрүөхтээхтэр-харайыахтаахтар. Онон билигин сүрүн сорукпут -- өрөспүүбүлүкэ лесопожарнай формированиетын үлэһиттэрин ахсаанын элбэтии уонна тиэхиньикэнэн хааччыллыыны бөҕөргөтүү”.

Ил Дархан баһаардары бохсууга үлэлээбиттэргэ махтанна уонна эһиилги сайыҥҥа бэлэмнэнии үлэтэ номнуо саҕаламмытын эттэ.