Сахамин Афанасьев кыттыбыт “РФ Аартыкатын зонатыгар оҥоһуллубут экологическай хорумньуну туоратыы судаарыстыбаннай бэлиитикэ соругунан буолар” диэн панельнай сессията РФ Аартыкатын зонатыгар олоххо киириэхтээх “Ыраас тулалыыр эйгэ” бырайыакка туһаайыллыбыт. Аартыкаҕа мунньуллубут кутталлаах бөҕү-сыыһы ыраастааһын кыһалҕаларын, сир баайын хостооччулар бырамыыссыланнай үлэлэрин түмүгэр тахсар бөхтөрүн хомуйалларыгар эппиэтинэстээх буолуохтаахтарын туһунан кэпсэттилэр.

Сахамин Афанасьев сессияҕа кыттан баран, “Сахапарламент” саайт кэрэспэндиэнин кытта санаатын үллэһиннэ: “Мин Саха сирин Аартыкатын зонатыгар мунньуллар бөх экологияҕа оҥорор хорумньутун, чуолаан сир баайын хостуур үлэттэн хаалар тобохтору мунньааһын тиһигин, металлолом, быраҕыллыбыт уу тырааныспартарын харайыы туһунан иһитиннэрии оҥордум, баар кыһалҕалары бэлиэтээн туран этиилэри киллэрдим”.

Ол курдук, Сахамин Афанасьев Аартыка экологията кэбирэҕинэн “Тулалыыр эйгэни харыстааһын туһунан” федеральнай сокуон мунньуллубут бөх тулалыыр эйгэҕэ оҥорор хорумньутун сыаналааһынын туһунан ыстатыйатыгар уларытыы киллэрэр туһунан этии киллэрбит. Тимирбит суудуналары хомуйууну субсидия быһыытынан федеральнай бүддьүөттэн үбүлээн туран уу тырааныспарын бассейыннарын күүһүнэн ыытар тоҕоостооҕун бэлиэтээбит.  

“Ыраас тулалыыр эйгэ” федеральнай бырайыак иһинэн Аартыка экологиятын кыһалҕатын быһаарар кыах суох. Ол иһин бөхтөрүн туһаҕа таһаарар бырамыыссыланнай тэрилтэлэргэ сокуонунан чэпчэтии көрүөххэ наада. Холобур тимиргэ наадыйыы улаатарын ситиһиэххэ наада”, -- диэн иһитиннэриитигэр бэлиэтээбит.

Маны таһынан Сахамин Афанасьев “бөх реформатын” кэмигэр уонна көдьүүстээхтик ыытар туһугар эрэгэйиэннэргэ судаарыстыбаннай өйөбүл наадатын ыйбыт.