Петр Гоголев  тыл этиитигэр кэллиэгэлэрэ  Амур уобалаһыгар анаан-минээн ыҥырбыттарыгар  махтанарын биллэрдэ.  Петр Васильевич соторутааҕыта, олунньу 5 күнүгэр,  СӨ Ил Түмэнэ уонна Амур  уобалаһын Сокуону таһаарыыга  мунньаҕа бииргэ үлэлииллэригэр аналлаах Сөбүлэһии түһэрсиллибитин  санатта.  Салгыы парламент бэрэссэдээтэлэ   Ил Түмэн  үлэтин туһунан сиһилии билиһиннэрдэ. «Хотугу аҕыйах ахсааннаах төрүт норуоттарын  бэрэстэбиитэллэрэ -- дьокутааттар Ассамблеялара  үлэтин  ситиһиилээтик саҕалаабыта. Ил Түмэн Бэрэссэдээтэлин иһинэн  Уопсастыбаннай-консультативнай сэбиэт  тэриллэн  таһаарыылаахтык үлэлиир. Бу сэбиэккэ  Саха сирин парламеныгар  хаһыс да ыҥырыылаах мунньахха үлэлээбит бэрэссэдээтэллэр, дьокутааттар, экэниэмикэ араас салаатыгар үлэлээбит уопуттаах эспиэртэр бааллар», - диэн  парламентарий билиһиннэрдэ. Итини тэҥэ, Петр Гоголев   Ил Түмэҥҥэ уопсастыбаннас актыыбынай көҕүлээччилэрэ  сокуон бырайыактарыгар  кыттан санааларын этэллэригэр аналлаах   саҥа киэп быһыытынан «Аһаҕас парламент” диэн былаһаакка үлэлээбитин, “Эспиэр чааһа” диэҥҥэ уопсастыба уонна судаарыстыба бүгүҥҥү кыһалҕаларын быһаарыыга  дьүүллэһии ыытылларын туһунан кэпсээтэ.   «Муниципальный чаас» диэн былаһааккаҕа норуот дьокутааттара биирдиилээн муниципальнай тэриллиилэр  социальнай-экэнэмиичэскэй сайдыыларын боппуруостарыгар аналлаах мунньахха кытталларын иһитиннэрдэ. Парламент бэрэссэдээтэлэ   өрөспүүбүлүкэ үбүн быһаарар сүрүн докумуон  ылыныллыан иннинэ   “нулевой" истиилэр ыытыллалларын  кэпсээтэ.  Петр Гоголев  тыл этиитин түмүгэр кэллиэгэлэрин  эһиил муус устарга  «Уһук Илиҥҥи  уонна Забайкалье» диэн парламеннар ассоциацияларын мунньаҕар уонна  Саха АССР төрүттэммитэ 100 сылын бэлиэтиир тэрээһиҥҥэ ыҥырда. Салгыы Амур уобалаһын Сокуону таһаарар мунньаҕын дьокутааттара интэриэһиргиир ыйытыыларын биэрдилэр.

 Сүрүн мунньах иннинэ СӨ Ил Түмэнин уонна  Амур  уобалаһын Сокуону  таһаарар  мунньаҕын салайааччылара көрсөн, пандемия кэмигэр  парламеннарга  онлайн-куоластааһыны киллэриигэ уонна  дистанционнай үлэни тэрийиигэ уопуттарын атастастылар.

Көрсүһүүгэ Ил Түмэн Бэрэссэдээтэлэ  Петр Гоголев  уонна Амур  уобалаһын Сокуону таһаарар мунньаҕын  Бэрэссэдээтэлэ  Вячеслав Логинов  эрэгийиэннэргэ   улахан суолтаны ылар аграрнай секторы сайыннарыы   боппуруостарын тула, итини тэҥэ,  парламеннар федеральнай таһымҥа  көҕүлээһиннэри киллэриилэрин туһунан дьүүллэстилэр уонна   сүрүн хайысхаларга бииргэ үлэлииргэ быһаарыныы ылыннылар. Көрсүһүү кэмигэр   парламеннар  үлэлэригэр  сыыппара технологиятын туһаныыга уопуттарыттан үллэһиннилэр.  Ил Түмэн аппараатын салайааччытын солбуйааччы  уонна иһитиннэрэр-ырытар управление салайааччыта  Василий Миронов  Ил Түмэн  сыыппараҕа үлэтин туһунан кэллиэгэлэригэр иһитиннэрии оҥордо.   Ил Түмэн  порталын саҥардыы өссө 2019 сылтан саҕаламмыта. Маҥнайгы түһүмэххэ  саҥа портал оҥоһуллубут.  2020 сылга  иккис түһүмэххэ   ыраахтан олорон куоластыыр модулу оҥорон үлэлэтэр ситиһиллибит. Ити сөптөөх үлэ эрдэ ыытыллыбытын түмүгэр, былырыын пандемия кэмигэр  ыам ыйыттан  Ил Түмэн пленарнай мунньахтара дистанционнай киэбинэн туох да харгыһа суох ыытыллан барбыттара. Ол курдук, дьокутааттар ыраахтан олорон эрэ бэйэлэрин санааларын этэр уонна  сокуону оҥорууга куоластыыр кыахтаммыттара. Биир сүрүн ситиһиинэн портал саҥа модула  дьокутааттар куоластаабыттарын тута ааҕан, боротокуоллаан   иһэрэ буолбута.   Салгыы  Амур  уобалаһын Сокуону таһаарар мунньаҕын аппараатын салайааччы  Мария Добротворская иһитиннэрбитинэн,  Сокуону таһаарар парламент үлэтин тиэхиньиичэскэй бырагырааматын комплексын 2020 сылтан саҥардан саҕалаабыттар.  Саҥа систиэмэ көмөтүнэн  дьокутааттар парламент мунньаҕар ыраахтан олорон кыттар уонна электроннай сыыппара көмөтүнэн илии баттыыр кыахтаммыттар.