КУРС ЦБ: $ 75,86 | 89,06

Бүгүн РФ Госдуматын дьокутаата Федот Тумусов суруналыыстар ыйытыыларыгар эппиэттээтэ.

Бүгүн РФ Госдуматын дьокутаата Федот Тумусов суруналыыстар ыйытыыларыгар эппиэттээтэ.

“Быйыл аны күһүн РФ Госдуматын быыбарыгар кыттаҕын дуо?» диэн ыйытыыга, «Быыбарга кыттабын. Мин саха норуотун аатыттан бэрэстэбиитэл буолан, Госдумаҕа үлэлии сылдьабын. Норуот салгыы итэҕэйдэҕинэ,  кинилэр тустарыгар этэн-тыынан, туруорсан салгыы үлэлииргэ бэлэммин», - диэн Федот Семенович эппиэттээтэ.  

«Дьокуускай куорат баһылыгын дуоһунаһыгар Виталий Обедины тоҕо өйүүргэ сананныгыт?» (дьиҥэр, кини  тустаах баартыйа чилиэнэ буолбатах) диэн ыйыппыттарыгар, «Тоҕо диэтэххэ, кини уһулуччулаах экэнэмиис, сыыппараҕа сыһыаннаах. Саамай сүрүнэ, былаас хайдах үлэлиирин, тугунан тыынарын ис-иһиттэн билэр. Куоракка хаһаайыстыбанньык наада дииллэр. Этэргэ дылы, лаппааҕы туттан баран, хаар ыраастыы тахсыахтаах. Ити сыыһа санаа, өйдөбүл. Мин хаһан эрэ Үөһээ Бүлүүгэ  тутуу хампаанньатын салайа сылдьыбытым. Манна биир бириинсип тутуһуллар.  Холобур, салайааччы суоҕун да үрдүнэн хампаанньа тохтоло суох үлэлиэхтээх. Бу буолар салайааччы күүһэ, сатабыла. Дьокуускай куоракка эмиэ оннук буолуохтаах, мэр суох да буоллаҕына,  баар дьон үчүгэйдик, таһаарыылаахтык үлэлии олоруохтаахтар. Салайааччы үлэ хаамыытын эрдэттэн үчүгэйдик аттаран туруоруохтаах. Ол механизм тохтоло суох үлэлии туруохтаах. Виталий Обедин куорат билиҥҥи кыһалҕатын ис-иһиттэн уонна ол хайдах быһаарыллыахтааҕын үчүгэйдик билэр. Бу кини саамай сүрүн куоһура буолар. Биһиги уонча хандьытааттан кинини таллыбыт», - диэн  Федот Тумусов санаатын аһаҕастык эттэ.

Былырыын ахсынньыга Ил Дархан Айсен Николаев норуот дьокутааттарыгар Анал этиитигэр Ил Түмэн тутулун уларытарга диэн этии киллэрбитэ. Бу манна Федот Семенович «Ил Түмэн диэн тугуй? Ил Түмэн диэн, бастатан туран, бэрэстэбиитэллээх былаас уоргана. Ол аата нэһилиэнньэттэн бэрэстэбиитэллэр талылланнар, кинилэр интэриэстэрин көмүскүөхтээхтэр, туруулаһыахтаахтар. Иккиһинэн, Ил Түмэн сокуону оҥорор былаас. Ол аата манна сокуону оҥорор кыахтаах, уопуттаах дьон үлэлиэхтээхтэр. Онон Ил Түмэҥҥэ өрөспүүбүлүкэ 35 улууһуттан, кинилэр интэриэстэрин көмүскүүр кыахтаах, биирдии бэрэстэбиитэл хайаан да баар буолуохтаахтар. Иккиһинэн, сокуону оҥорууну ис-иһиттэн билэр-көрөр уопуттаах дьон үлэлиэхтээхтэр.

Мин санаабар, икки балаата баар буолуохтаах. Өрөспүүбүлүкэ балаатата диэҥҥэ 35 улуустан  бэрэстэбиитэллэр талыллыахтаахтар. Итинник састааптаах балаата бүддьүөтү бигэргэтиигэ,  Конституцияны уларытыыга кыттыахтаах. Ол аата кинилэр күн аайы мунньахтаабаттар,  ыйга биирдэ түмсэн, ити этиллибит боппуруостары быһаарыахтаахтар. Оттон алларааҥҥы балаатаҕа 21-25 дьокутаат үлэлиэхтээх. Манна профессиональнай таһымнаах  юрист  үөрэхтээх дьокутааттар  сокуону оҥорууга быһаччы кыттыахтаахтар. Оттон 15-20 киһилээх эрэ оҥордохторуна, этэргэ дылы, ситэриилээх былаас хармааныгар укта сылдьар дьокутааттара эрэ буолалларыгар тиийэллэр. Парламент тутула  уларыйыахтаах эрээри, ол хайысхата атын суолу тутуһуохтаах. Холобур, мин өйдүүрбүнэн, билиҥҥи ситэриилээх былаас профессиональнай буолуохтаахтар диэнинэн салайтаран, дьокутааттар ахсааннарын аҕыйатан,  этэргэ дылы, бырабыыталыстыба дьаһалтатын отделын курдук оҥороору гынар. Маннык адьас буолуо суохтаах”, - диэн хоруйдаата.  

маны тумус фото 2 

Комментарии (1)

This comment was minimized by the moderator on the site

Опыттаах политик өйдөнөр кына по полочкам быһаарбыт. Барыта сөптөөх этии.

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением
ПОДЕЛИТЬСЯ СТАТЬЕЙ