Хомолтолооҕо, олоҕуҥ-дьаһаҕыҥ хайдаҕый да, өйүҥ-санааҥ даҕаны онтон олус ыраах өппөт буолуута. Ил Түмэни уларытан тэрийии боппуруоһугар булгуччу норуот санаата, тыла-өһө иһиллиэхтээх. Ол тоҕотун быһаара сатыыр наадата суох. Интэлигиэнсийэ-бааһынай, куорат-тыа сирин олохтооҕо диэн араарсыыта суох.

Виктор Михайлов, уопсастыбанньык, Дьокуускай куорат олохтооҕун санаата:

- Өтөрдөөҕүтэ Ил Дархан А.С.Николаев өрөспүүбүлүкэ  Ил Түмэнин уларытан тэрийии наадатын туһунан санаатын этэн турар. Итинэн ситимнээн, уопсастыбаҕа кэпсэтии, ол иһигэр мөккүөр бара турар.

Бэйэм санаабар, Ил Түмэн тэрээһинигэр, үлэтигэр-хамнаһыгар уларытыылары киллэрии сиэрдээх суол. Бастакытынан, РФ Төрүт сокуонугар уларыйыылар киирдилэр. Федерация субьектарын сокуону ылынар уорганнарын тустарынан төһө да туһааннаах ыйыы-кэрдии суоҕун иһин, уларыйыылар киирбиттэрин кытта сибээстээх араас хайысхалаах боппуруостар үөскээн тахсар төрүөттэрин аахсыбат буолар табыгаһа суоҕа көстөн турар суол.

Иккиһинэн, өрөспүүбүлүкэ сорох сокуоннарын РФ Төрүт сокуонугар уонна федеральнай сокуоннарыгар сөп түбэһиннэрии үлэтэ сөҕүрүйэ быһыытыйда. Онон Ил Түмэн үлэтин чопчулааһын сиэрдээх буолуоҕа.

Үсүһүнэн, Ил Түмэн дьокутааттарын ахсааннара аҕыйаатаҕына, бастайааннай идэтийбит төрүккэ олоҕуран үлэлиир, хамнастаах, өрөспүүбүлүкэ олоҕун-дьаһаҕын, үлэтин-хамнаһын сүрүннүөхтээх сокуоннары тиһигин быспакка оҥоруохтаах парламеҥҥа сөптөөх усулуобуйа тэриллиэх этэ.

Төрдүһүнэн, сорохтор урут үлэлээн сылдьыбыт икки балааталаах парламены тэрийэргэ этэллэр. Мин санаабар, оннук тэринии билиҥҥи кэмҥэ көдьүүһэ суох буолуоҕа. Кырасдааныскай уопсастыбаҕа кырасдааныскай өй-санаа үрдээбитин аахсар буоллахха, саҥардыллыбыт Ил Түмэн дьокутааттарын бэлитиичэскэй баартыйалартан сүүмэрдиир ордукка дылы. Итиччэтигэр талыллыбыт дьокутаат икки бүк хонтуруолга - баартыйа уонна нэһилиэнньэ өттүлэриттэн  – сылдьыа этэ.

Бэсиһинэн, Төрүт сокуоммутун да, олохпутун да сүрүннүүр сокуоннарбыт Федерация үрдүнэн биир буолбуттарынан, саҥа дьокутааттар олоххо-дьаһахха, үлэҕэ-хамнаска быһаччы сыһыаннаах, олохтоох усулуобуйаны эргиччи аахсар сокуоннары оҥоруунан дьарыктаныах этилэр. Ону кытта ылбыт сокуоннара олоххо толору үлэлииллэрин хонтуруоллуохтаахтар. Онон бэлиитикэ толоонуттан кыратык тэйэ түһэн, үлэлээн иитиллээччилэр бырааптарын сокуонунан араҥаччылааччы курдук биир сүрүн оруолларыгар киириэх этилэр.