Быыбардыыр 122 учаастак куоластарын түүннэри аахпыттарын түмүгэр, Евгений Григорьев (“Биир ньыгыл Арассыыйа”) иһин куоластааччы 44, 24 %-на биэрдэ. Виталий Обедин (“Сиэрдээх Арассыыйа”)– 38, 34 % . Савва Михайлов (КПРФ) – 11, 54%. Евгений Рябченка (ЛДПР) – 1,57 %. Иван Комаров (“Гражданская платформа”) – 1,51 %, Айаал Прокопьев (“Родина”) – 1,08 %.
Евгений Григорьев: «Мин быыбар иннинээҕи программабын итэҕэйэн, бэйэлэрин гражданскай позицияларын толорон, куоластарын миэхэ биэрбит дьоҥҥо махтанабын. Бу барыбыт кыайыыта. Дьон-сэргэ интэриэһин, бэлитиичэскэй баартыйаларыттан тутулуга суох, барыларын киэнин үрдүктүк тутуом, суобастаахтык кыһаллан үлэлиэм”, -- диэн махтанна.
Саҥа баһылыгы Ил Дархан Айсен Николаев эҕэрдэлээтэ: “Евгений Григорьев бу сүктэриллибит эбээһинэһин дьоһуннаахтык сүгүөҕэр, Дьокуускай тупсарын туһугар көдьүүстээхтик үлэлиэҕэр эрэнэбин. Ситиһиини! Быыбарга кыттыбыт бары дьоҥҥо махтанабын”.
Бу иннинэ мэр дуоһунаһыгар үлэлээбит Сардаана Авксентьева: “Эн өссө биирдэ чаҕылхайгын дакаастаатыҥ. Олохтоох толкуйгуттан, киэҥ өйгүттэн-санааҕыттан астынабын”, -- диэн киэн туттарын, Дьокуускай эрэллээх киһи көрүүтүгэр-истиитигэр киирбититтэн үөрэрин биллэрдэ.
Ыспыраапка
Евгений Николаевич Григорьев, 1985 с.т.
2008 с. Н.Э. Бауман аатынан Москватааҕы судаарыстыбаннай техническэй университет “инженер-экономист” үөрэҕин бүтэрбитэ.
2015 с. – А.Е. Кутафин аатынан Москватааҕы судаарыстыбаннай юридическай университеты бүтэрбитэ.
2016 с. – РФ Бырабыыталыстыбатын иһинэн Норуот хаһаайыстыбатын уонна судаарыстыбаннай сулууспа академиятын бүтэрбитэ.
2017 с. -- СӨ Ил Дарханын иһинэн инновационнай менеджмент үрдүкү оскуолатын дириэктэрэ.
2018 с. – Территориялары сайыннарар агентство генеральнай дириэктэрэ.
2019 с. -- Дьокуускай куорат баһылыгын солбуйааччы.
2020 с. -- Дьокуускай куорат баһылыгын бастакы солбуйааччы.
“Арассыыйа лиидэрдэрэ-2019” куонкурус финалиһа.
- 0
- 0
- 0
- 0
- 0
- 0