Петр Васильевич: «Владимир Путин Анал этиитэ РФ судаарыстыбатын социальнай-экэнэмиичэскэй сайдыытын бары суолталаах хайысхаларын таарыйда. 2030 сылга диэри биһиги олус үрдүк кирбиини, соругу туруоруннубут. Ону хайаан да ситиһиэхпит диэн эрэнэбин --  биһиэхэ орто саас 78 сылга тэҥнэһиэҕэ. Ийэлэргэ уонна оҕолорго сөптөөх болҕомто ууруллубута махталлаах дьыала. Бу хайысхаҕа судаарыстыбаннай былаас уорганнара бары биир санаанан үлэлиибит. Холобур, биһиги «Аартыка оҕолоро» бырайыакпытынан оҕо лааҕырга сынньана барар путевкатын сыанатан аҥаарын уйунар туһунан киллэрбит этиибит РФ Бэрэсидьиэнин этиитин, соругун  кытта атылыы буолла.  

Владимир Путин үгүс эппит боппуруостара, этиилэрэ  федерация субъектарыгар, ол иһигэр Саха сиригэр улахан суолталаахтар. Биһиэхэ саҥа энэргэтиичэскэй бэлиитикэни  олоххо киллэрии үчүгэй сонунунан буолар. Итинэн сиэттэрэн, биһиги хотугу оройуоннарбытыгар энэргиэтикэ боппуруостарыгар сөптөөх быһаарыылары эрэнэ күүтэбит. Саха сирин олохтоохторо учаастактарыгар диэри гаас ситимин тиэрдии босхо оҥоһуллуохтааҕын туһунан үөрэ истибит буолуохтаахтар. Саха Өрөспүүбүлүкэтэ  «Газпром» ПАУо өйөбүлүнэн нэһилиэнньэлээх пууннары гаастааһыҥҥа ылыммыт былаанын олоххо киллэриэҕэ. Саха сиригэр сир баайын хостуур улахан хампаанньалары кытары көдьүүстээх үлэ барыахтааҕын туһунан иһиттибит. Ити үлэ РФ субъектарын судаарыстыбаннай былаастарын уорганнарынан ситиһиллиэхтээх. Ол тосхоллорун ыйда. Владимир Путин тустаах улахан хампаанньаларга барыһы ылыы эрэ инники күөҥҥэ буолбакка, экологияҕа эппиэтинэстээх буолуохтааҕын эттэ. Тулалыыр эйгэҕэ хоромньу тахсар буоллаҕына, ону туоратары тустаах хампаанньа барытын уйунуохтаах. 

Владимир Путин: «Дойду иннин диэки кимиилээхтик барара эрэгийиэннэр сайдыыларынан ситиһиллэр», -- диэн эттэ. Эрэгийиэннэр үп-экэнэмиичэскэй өттүнэн боломуочуйалара кэҥиэхтээҕин,  инфраструктураны  сайыннарыыга көмөлөөх буолар саҥа инструменнар туһаныллыахтаахтарын үөрэ иһиттибит. Бырамыысыланнас улахан хампаанньаларын кытта бииргэ үлэлээһин  чэрчитинэн уонна федеральнай киин өйөбүлүнэн, Саха сирэ   байылыат олохтоноругар, сайдыылаах, дьоһун инфраструктуралаах уонна инникилээх  буоларыгар эрэнэбин!».