Ил Дархан от ыйын 5 күнүгэр уурааҕы тохтотор туһунан дьаһалы таһаарбыта. От ыйын 8 күнүгэр Ил Дархан дьаһалынан уонна үөрэх-иитии эйгэтигэр үлэлиир педагогическай уопсастыбаннас туруорсуутунан укаас көтүрүлүннэ.
Билимҥэ, үөрэххэ, култуураҕа, СМИ-гэ уонна уопсастыбаннай түмсүүлэр дьыалаларыгар Ил Түмэн бастайааннай кэмитиэтин бэрэссэдээтэлэ Феодосия Габышева бу туһунан санаатын маннык этэр: “Олунньуга уураах тахсаатын кытта төрөппүттэр, иитээччилэр, оскуола иннинээҕи үөрэх тэрилтэлэрин салайааччылара уонна боропсойуус лиидэрдэрэ кэлэн бу уурааҕы тохтотор туһунан санааларын этиммиттэрэ. Өрөспүүбүлүкэ парламеныгар олохтоох бэйэни салайыныы уорганнарын кытта сүбэ мунньахтар ыытыллыбыттара. Ил Дархан от ыйын 2 күнүгэр ыыппыт быһа биэриитин түмүгүнэн, уурааҕы тохтотор дьаһалы таһаарда.
Оскуола иннинээҕи үөрэх тэрилтэлэрэ территориальнай уратыларын уонна бөлөхтөр туолууларын учуоттаан, саҥа нуормалар олохтоннулар. Ол курдук, 3 саастарыгар диэри оҕолоох уһуйааннарга: тыа сиригэр – 15, куоракка – 20; үстэриттэн-сэттэлэригэр диэри: тыа сиригэр – 20, куоракка – 25 үлэһит үлэлиирэ быһаарылынна. 12 чаастаах үлэ күнэ тыытыллыбат, уруккутун курдук оннунан хаалар буолла. Сахалыы тыллаах уһуйааннарга үөрэх ороскуотугар көрүллэр харчы коэффициена улаатта. Маны таһынан уларыйбыт уураахха өрөспүүбүлүкэ бүддьүөтүттэн үбүлэнэр дуоһунастар (миэдиктэр, тьютордар уонна ассистент-көмөлөһөөччүлэр) испииһэктэрэ бигэргэннэ.
Саха өрөспүүбүлүкэтэ оскуола иннинээҕи үөрэхтээһин эйгэтигэр инновационнай эрэгийиэн быһыытынан биллэр. Онтон уопута “уникальнай” уопутунан ааҕаллар. Биһиги уопсай сыалбытынан бу баай уопуту эдэр көлүөнэ педагогтарга тиэрдии буолар”.
- 0
- 0
- 0
- 0
- 0
- 0