Ааспыт быыбарга “Новые люди” баартыйа 5 %-наах кирбиини ылла. Онон баартыйа федеральнай испииһэгиттэн Сардаана Авксентьева Госдумаҕа ааста.
Маны таһынан, “Сиэрдээх Арассыыйа” баартыйа испииһэгинэн Федот Тумусов төрдүс төгүлүн уонна Даурскай биир мандааттаах уокуруктан (Забайкалье кыраайыттан) Ил Түмэн дьокутаата Юрий Григорьев киирдилэр.
Аны РФКП Саха сиринээҕи салаатын сэкирэтээрэ, Ил Түмэн дьокутаата Петр Аммосов сирэй дьокутааттар быыбардырын түмүгүнэн талыллан ааста.
Быыбар түмүгүнэн РЛДП Госдума VIII Ыҥырыылаах Мунньаҕар 18 мандаатка тигистэ. Онтон биир мандат Гаврил Парахиҥҥа барда.
Ахсыс Госдума састаабыгар “Биир ньыгыл Арассыыйа” – 324 мандааты ылары ситистэ. Онон федеральнай испииһэгинэн Госдумаҕа “Биир ньыгыл Арассыыйа” баартыйаттан Галина Данчикова ааста.
Алексей Еремеев: “Дьон көхтөөхтүк кытынна”
Ил Түмэн спикерэ Алексей Еремеев Саха сирин олохтоохторо ааспыт быыбарга көхтөөхтүк кыттыбыттарыгар махтанна.
– Уһук Илиҥҥи федеральнай уокурукка уонна Арассыыйа Федерациятын үрдүнэн биһиги гражданнарбыт ааспыт быыбарга олус көхтөөхтүк кытыннылар. Саха сирин олохтооҕун баһыйар аҥара куоластаата.
Өрөспүүбүлүкэҕэ тыҥааһыннаах, ол эрээри чиэһинэй быыбардар аастылар. Биһиги демократическай судаарыстыбаны тутабыт. Онон араас санаалар этиллэллэрэ саамай сөптөөх. Хас биирдии гражданин санаата учуоттаныллыах, – диэн Алексей Ильич быыбар тэрээһинин үрдүктүк сыаналаата.
Маны таһынан, өрөспүүбүлүкэ парламенын спикерэ кэллиэгэлэрин Петр Аммосовы уонна Юрий Григорьевы кыайыыларынан эҕэрдэлээтэ.
– Юрий Иннокентьевич Григорьев атын быыбардыыр уокуруктан кытынна. Киниэхэ Забайкалье кыраайын олохтоохторо итэҕэллэрин биллэрдилэр. Ити биһиги дьокутааттарбыт куорпуһа лаппа кыахтааҕын көрдөрөр, – диэн Алексей Еремеев санаатын үллэһиннэ.
- 0
- 0
- 0
- 0
- 0
- 0