Ил Түмэн ыччакка, физическай култуураҕа уонна спорка сис кэмитиэтин бэрэссэдээтэлэ Михаил Гуляев саҥа сокуон историческай үтүө үгэстэри бөҕөргөтүүгэ, эдэр көлүөнэлэр төрөөбүт дойдуларыгар бэриниилээх уонна ытыктабыллаах буола улааталларыгар туһуланар диэн бэлиэтээтэ.

– Сокуону оҥорууга Дьокуускайдааҕы кадетскай оскуола-интернат, улуустар бэрэстэбиитэллэрэ, улуустар Сэбиэттэрин дьокутааттара уонна Саха сирин ыччатын парламена быһаччы кыттыыны ыллылар, бэйэлэрин анал этиилэрин оҥорон киллэрдилэр. Ону барытын бүтүннүү учуоттаан, бу сылга саҥа сокуон оҥоһуллан бүтэрэ былааннанар.

Сокуон өрөспүүбүлүкэ социальнай уонна этнокултуурунай уратыларын, норуоттарын үтүө үгэстэрин барытын учуоттуур. Ону тэҥэ федеральнай правовой аакталарга сөп түбэһэр, – диэн Михаил Гуляев кэпсээтэ.

Норуот дьокутаата саҥа сокуон олус суолталааҕын ыйан туран, күн бүгүн үлэлии турар “СӨ үөрэхтээһинин туһунан”, “СӨ физическай култууратын уонна спордун туһунан”, “СӨ историятын уонна култууратын пааматынньыктарын харыстааһын туһунан” сокуоннарга патриотическай өйдөбүлү күүһүрдэр уларытыылар киириэхтэрин наадатын эттэ.

Санатан эттэххэ, Арассыыйа сорох субъектарыгар патриотическай иитиини сүрүннүүр нормативнай правовой аакталар номнуо ылыллан тураллар.