Мунньах кэмигэр Ил Түмэн спикера үс сүрүн боппуруоска тохтоото. “Парламент үлэтигэр биири бэлиэтиэххэ наада. Уустук эпидемиологическай балаһыанньа кэмигэр, аҥаардас видео-кэмпириэнсийэ систиэмэтинэн эрэ үлэлиир, ситэтэ суоҕун көрдөрдө. Онон билиҥҥитэ Роспотребнадзору кытта үлэлэһэ сылдьабыт. Барыта табылыннаҕына, сэтинньи ыйтан үгэскэ кубулуйбут үлэ көрүҥэр көһүөхпүт”, – диэн Петр Васильевич иһитиннэрдэ. Инньэ гынан, парламент сэтинньи ыйтан саҕалаан урукку систиэмэнэн үлэлээн барар былааннаах.

Петр Гоголев дойду сүрүн парламена – Госдума – күһүҥҥү сессиятын бүтүннүү сирэй көрсөн олорон үлэлиир былааннааҕын санатта. Ол гынан баран, 65-тэн үөһэ саастаах дьокутааттар пленарнай мунньахтарга уонна да атын тэрээһиннэргэ ыраахтан олорон кытталларыгар сүбэлээтэ.

Салгыы парламентарий үгэскэ кубулуйбут үлэ көрүҥэр көһөн баран, өрөспүүбүлүкэ Ил Дарханын кытта сүбэлэһэн, уочараттаах пленарнай мунньах күнүн-дьылын болдьоһор уонна ыытар наадалааҕын эттэ. “Элбэх боппуруос мунньулунна. Ону барытын сирэй көрсөн олорон быһаарар, ырытар ордук. Бастатан туран, каадыр боппуруостара быһаарыллыбакка тураллар. Мировой суудьуйалары анааһын, өрөспүүбүлүкэ үрдүкү дуоһунастарын бигэргэтии, ол иһигэр бырабыытылыстыба бэрэссэдээтэлин, бырабыытылыстыба бэрэссэдээтэлин солбуйааччыларын, миниистирдэри... Өрөспүүбүлүкэ уопсастыбаннай палататын боппуруоһа эмиэ аһаҕас турар. Итиннэ барытыгар видео-кэмпириэнсийэ көмөтүнэн кистэлэҥ куоластааһыны ыытар табыллыбат”, – диэтэ Петр Гоголев.

Парламент күһүҥҥү үлэтэ Арассыыйа Федерациятын Төрүт Сокуонун көннөрүүлэрин кытта сибээстээх. “Төрүт сокуон көннөрүүлэригэр өрөспүүбүлүкэ сокуоннарын сөп түбэһиннэрэр үлэҕэ ыкса ылсыахпытын наада”, – диэн спикер бэлиэтээтэ.

Күһүҥҥү сессия биир сүрүн хайысхата – бүддьүөт. “Бүддьүөт бырайыага номнуо оҥоһулунна. Сис кэмитиэттэр бырайыагы көрүөхтэрин, дьүүллэһиэхтэрин наада. Аһаҕас истиилэр былааннаннылар. Сэтинньи 5 күнүгэр диэри бастакы ааҕыытын ааһыахтаах. Ахсынньы 1 күнүгэр диэри бүддьүөт бигэргэниэхтээх”, – диэн Петр Гоголев тоһоҕолоото.

Манна кини икки кэнники сыл иһигэр үөскээбит кыһалҕаларга ордук улахан болҕомтону уурар наадатын эттэ. Ол курдук, ДьУоХХ, үөрэҕирии, доруобуйа харыстабылын эйгэлэригэр элбэх боппуруостар күөрэйэн тахса тураллар.

Маны таһынан, мунньах кэмигэр парламент алтынньы ыйдааҕы үлэтин-хамнаһын былааннаатылар: бырабыытылыстыба чаастарын, “төгүрүк остуоллары”, уо.д.а. тэрээһиннэри.