“Төгүрүк остуолга” норуот дьокутааттара, СӨ Тырааныспарга уонна суол хаһаайыстыбатыгар министиэристибэтин, СӨ Борокуратууратын, СӨ аччыгый авиациятын ассоциациятын, “Дьокуускай аэропорда” АУо, “Аэропорты Севера” федеральнай тэрилтэ, “Якутия” авиахампаанньа, “Полярные авиалинии” авиахампаанньа, авиация үлэһиттэрин профсойууһун бэрэстэбиитэллэрэ кыттыыны ыллылар.

Өрөспүүбүлүкэ олоҕор аччыгый авиация сайдыыта улахан суолталаах. Этэргэ дылы, Саха сирин улахан аҥаара күттүөннээх суола-ииһэ суох. Онон ыраах сытар нэһилиэнньэлээх пууннарга сөмөлүөттэр эрэ сылдьар кыахтаахтар. Ол гынан баран, нэһилиэнньэ өрөспүүбүлүкэ иһигэр авиатарыыптар аһара үрдүк сыаналаахтарын туһунан аймаммыта быданнаата. Инньэ гынан Ил Түмэн Судаарыстыбаннай Мунньаҕа ити боппуруоһу хаста да дьүүллэһэ сылдьыбыта. Бу да сырыыга “төгүрүк остуолга” киэҥ хабааннаах, дириҥ ис хоһоонноох кэпсэтии таҕыста.  

Ил Түмэн инфраструктураҕа сис кэмитиэтин бэрэссэдээтэлэ Игорь Григорьев Саха сиригэр аччыгый авиация сайдыыта стратегическай суолталааҕын ыйда. Кини өрөспүүбүлүкэ сирин-уотун 52,2 % Аартыка эргимтэтигэр сытарын санатта. Онно 13 улуус киирэрин эттэ. “Өрөспүүбүлүкэ улуустарын 90 % төгүрүк сылы быһа суола-ииһэ суохтар. Онон кинилэр социальнай экэнэмиичэскэй сайдыылара авиацияттан быһаччы тутулуктаах” диэн бэлиэтээтэ. Игорь Григорьев аччыгый авиация сайдыыта тыын суолталаах боппуруос диэн тоһоҕолоото.

Өрөспүүбүлүкэ авиатарыыптарын уонна аччыгый авиация сайдыытын туһунан дакылааты тырааныспар миниистирэ Владимир Сивцев оҥордо.

Кини билиҥҥитэ өрөспүүбүлүкэ авиахампаанньалара 61 хайысханан, ол иһиттэн 32 эрэгийиэннэр икки ардыларынааҕы уонна 29 өрөспүүбүлүкэ иһинээҕи хайысхаларынан айанньыттары таһалларын иһитиннэрдэ. Ону таһынан, “Полярные авиалинии” уонна “Алроса” авиахампаанньалар социальнай суолталаах сырыылары 23 улуус 100 нэһилиэнньэлээх пуунугар оҥороллорун бэлиэтээтэ. Сыллата өрөспүүбүлүкэ хампаанньалара бары хайысхаларынан 1 мөл. 390 тыһ. айанньыты тиэйэллэрин эттэ. Ол иһиттэн 246,6 тыһ. киһи өрөспүүбүлүкэ иһигэр көтөр эбит.

Миниистир хампаанньалар сыаналарын Салгын кодексатын 64-с ыстатыйатынан сирдэтэн, Арассыыйа Тырааныспарын министиэристибэтэ 2008 сыл балаҕан ыйын 25 күнүнээҕи 155 №-дээх бирикээһигэр олоҕуран таһааралларын эттэ. Ол курдук, билиэт сыаната көтүү ороскуотуттан, сөмөлүөтү көрүүттэн-харайыыттан  уонна сөмөлүөт туолуутуттан тутулуктаах диэтэ. Владимир Сивцев билигин ити өссө чэпчэтиллибит сыаналар диэн бэлиэтээтэ. Ол курдук, үгүс хайысха социальнай суолталаах буолан, хампаанньалар олох да авиатарыып бэйэҕэ турар сыанатыттан лаппа түһэрэн атыылыыллар эбит.

Билиҥҥитэ чэпчэтиллибит сыаналаах билиэттэринэн өрөспүүбүлүкэ 29 улууһугар, о.э. 189 нэһилиэнньэлээх пуунугар көтүөххэ сөп. Онно эбии 2024 сылга диэри магистральнай уонна эрэгийиэннээҕи хайысхаларга билиэт сыанатын 50 % түһэрэргэ федеральнай бүддьүөттэн кыттыгас үбү-харчыны ситиһэргэ үлэ бара турар эбит. Маны таһынан, РФ Бэрэсидьиэнин сорудаҕынан “Уһук Илиҥҥи авиахампаанньа” тэриллиэхтээх. Оччоҕо өрөспүүбүлүкэ иһигэр  чэпчэтиллибит билиэттэринэн көтөр кыах үөскүөхтээх.   

Миниистир Владимир Сивцев Саха Өрөспүүбүлүкэтигэр аччыгый авиацияны сайыннарарга былаан оҥоһуллубутун кэпсээтэ. Ол курдук, СӨ Бырабыытылыстыбата федеральнай киини кытта саҥа сөмөлүөттэри лизиҥинэн атыылаһарга, “Аэропорты Севера” федеральнай тэрилтэ ыстаапкатын “нуулга” түһэрэргэ, Аартыка эргимтэтигэр авиакеросин тиэрдиитин ороскуотун толуйарга, Уһук Илин ыраах оройуоннарыгар көтөр хайысхалар ороскуоттарын сабарга туһааннаах үлэлэри саҕалаабытын билиһиннэрдэ. Ити былаан олоххо киирдэҕинэ, авиатарыыптар сыаналара чэпчиэн сөп диэтэ.

“Төгүрүк остуолга” кэмигэр миниистир норуот дьокутааттарын этиилэрин иһиттэ уонна ыйытыктарыгар хоруйдаата. Ону сэргэ мунньах атын кыттыылаахтара эмиэ бэйэлэрин дакылааттарын билиһиннэрдилэр.