Тэрээһин РФ Аартыкатын түөлбэтигэр аналлаах бырайыактары олоххо киллэриигэ үлэлиэхтээх каадырдары бэлэмниир боппуруоска ананна. Сокуону оҥорооччулартан саҕалаан толорор былаас бэрэстэбиитэллэрэ, учуонайдар кыттан ити боппуруоска санааларын эттилэр. Вице-спикер Антонина Арассыыйа үөрэхтээһинин академиятыгар «төгүрүк остуолга» тыл этэригэр кыах биэрбиттэригэр махтанан туран, Аартыка матырыйаалынайа суох култуурунай нэһилиэстибэтин хаалларыыга болҕомто ууруллуохтааҕын ыйда. «Быйыл алтынньы 26 күнүгэр «2035 сылга диэри РФ Аартыка түөлбэтин сайыннарыы уонна национальнай өттүнэн куттал суох буолуутун хааччыйыы Страгетията ылыныллыбыта”, -- диэн Антонина Афанасьевна санатан туран, үс сүрүн боппуруоһу таарыйда.
“Бастакытынан, Аартыка норуоттарын матырыйаалынайа суох култуурунай нэһилиэстибэлэригэр тылынан үгэстэр, ол эбэтэр уус-уран тылынан толоруу искусствота, сиэр-туом, үгэһи тутуһуу, айылҕаны кытта алтыһыы киирэллэр. Аартыка норуоттарын матырыйаалынайа суох култуурунан нэһилиэстибэлэрин харыстааһыҥҥа сокуон өттүнэн өйөбүл наада. 2009 сыллаахха СӨ төрүт норуоттарын эпическэй нэһилиэстибэлэрин харыстыыр, араҥаччылыыр сокуон ылыллыбыта. 2019 сылллаахха итиннэ майгынныыр Арассыыйа бары норуоттарын эпическэй нэһилиэстибэлэрин харыстыыр сокуон Судаарыстыбаннай Дума көрүүтүгэр киллэриллибитэ», -- диэн Антонина Афанасьевна эттэ уонна ити сокуон барыла федеральнай таһымҥа өйөнөрүгэр эрэнэрин биллэрдэ.
Иккиһинэн, Антонина Григорьева каадыры бэлэмнээһиҥҥэ сүрүн болҕомтону Хотугу сиргэ үгэс буолбут хаһаайыстыба салаатын сайыннарыыга, араҥаччылааһыҥҥа уурарга эттэ. 2016 сылга үгэс буолбут хаһаайыстыба салаатыгар үлэлээччилэр ахсааннара 42 % кыччаабыт. Онон мантан сиэттэрэн, Хотугу сир хаһаайыттарын үөрэтии оскуола паартатыттан саҕаланыахтаах. Вице-спикер Саха сирин Аартыкатааҕы 13 оройуонугар 18 агрооскуола үлэлиирин санатта. Манна оҕолор балыктыырга, бултуурга уонна табаны, сылгыны, ынах сүөһүнү иитэргэ үөрэнэллэр. Парламентарий РФ тыатын хаһаайыстыбатын сокуонугар тыа хаһаайыстыбатынан дьарыктанар үрдүк үөрэх кыһаларын өйүүр туһунан киирбитин, онно агрооскуолалар тоҕо суохтарын санатта. Антонина Афанасьевна агрооскуолалар тыа хаһаайыстыбатын тиэхиньикэлэринэн, аныгы оборудованиеларынан хааччыллалларыгар судаарыстыбаннай көмө хайаан да наадатын быһаарда.
“Үсүһүнэн, Аартыка инновацияны сайыннарыыга сүрүн локомотивынан буолуохтаах. Инновацияны сайыннарыыга, күүскэ үлэлэтиигэ наука өттүттэн көмө, тирэх наада», -- диэн олус сөптөөх санааны эттэ. Онон Аартыка норуоттарын матырыйаалынайа суох култуурунай нэһилиэстибэлэрин харыстааһын уонна Хотугу сиргэ үгэс буолбут хаһаайыстыба салаатыгар үлэлиэхтээх каадырдары бэлэмнээһин федеральнай уонна эрэгийиэн таһымнарыгар сүрүн, тумус туттуллар боппуруостарынан буолуохтаахтар.
- 0
- 0
- 0
- 0
- 0
- 0