Форуму “Ийэ тыл кэскилэ” уопсастыбаннай тэрилтэ көҕүлээн ыытта. Манна төрөппүттэр, уопсастыбанньыктар, уһуйаан иитээччилэрэ, учууталлар, култуура үлэһиттэрэ ийэ тылынан иитиигэ бэйэлэрин уопуттарын, методикаларын уонна албастарын кытта үллэһиннилэр. “Ийэ тыл кэскилэ” уопсастыбаннай тэрилтэ 2018 сыллаахха тэриллибитэ. Кини сүрүн сыалынан-соругунан – ийэ тылы харыстааһын уонна сайыннарыы, ийэ тылын билэр кэнчээри ыччаты иитэн-үөрэтэн таһаарыы, ийэ тыл туттуллар эйгэтин кэҥэтии уонна сыыппара эйгэтигэр киллэрии буолар.
Форум кэмигэр Феодосия Габышева ааһан эрэр сылга ийэ тыл эйгэтин сүрүн ситиһиилэрин, төрөөбүт тыллар судаарыстыбаннай өйөбүллэрин туһунан билиһиннэрдэ, кэпсээтэ. Ол курдук, Өрөспүүбүлүкэ күнүн көрсө Национальнай бибилитиэкэ көмөлтөтүнэн “Яндекс.Переводчик” диэн сыһыарыыга саха тылын тылбааһа киирбитэ. 15 кинигэлээх саха тылын улахан быһаарыылаах тылдьыта оҥоһуллан бүппүтэ. Бу тылдьыкка 80 тыһ. кэриҥэ саха тыла киирэн быһаарыы ылбыта. Быйыл Саха сирэ “Саамай ааҕар эрэгийиэн” ааты ылары ситиспитэ.
Эһиилгиттэн, 2021 сылтан, “Саха Өрөспүүбүлүкэтин судаарыстыбаннай уонна төрүт тылларын 2020-2024 сылларга харыстааһын уонна сайыннарыы” бырагыраамата толору күүһүнэн үлэлиэхтээх. Ити сыалга кэлэр сылга норуот дьокутааттарын туруорсууларынан 56 мөл. солк. көрүллүбүтэ.
Маны таһынан, дьокутаат өрөспүүбүлүкэ сокуоннарын РФ саҥардыллыбыт Төрүт сокуонугар сөп түбэһиннэрии үлэтин туһунан кэпсээтэ. Ону сэргэ 2022-2032 сылларга төрүт омуктар тылларын уон сыла былааннанарын эттэ.
Эһиил Саха Өрөспүүбүлүкэтин үөрэҕин концепциятын ылыллыбыта 30 сыла, СӨ национальнай оскуолаларын үнүстүүтүн 60 сыла, К.С. Чиряев аатынан норуот педагогикатын киинин, этнопедагогика түмэлин 40 сыла бэлиэтэнээри тураллар диэтэ. Бу тэрээһиннэри таһынан 2021 сылга Саха сиригэр бүтүн Арассыыйатааҕы этнопедагогика кэмпириэнсийэтэ былааннанар. Онон норуот дьокутаата ити этиллибит тэрээһиннэргэ уопсастыба көхтөөхтүк кыттарыгар эрэнэрин эттэ.
Феодосия Васильевна төрөппүттэри уонна уопсастыбанньыктары эрдэ ылыллыбыт тэрээһиннэр резолюцияларын киэҥник туһанарга, ол иһигэр 2017 сыллаахха буолан ааспыт саха тылын учууталларын бастакы өрөспүүбүлүкэтээҕи сийиэстэрин быһаарыныыларын, ийэ тылын үөрэтии саҥа методикаларын уонна сыыппара технологияларын сайыннарыыга болҕомто ууралларыгар,итиэннэ салгыы бииргэ үлэлииргэ ыҥырда.
Ил Түмэн пресс-сулууспатын матырыйаалынан.
- 0
- 0
- 0
- 0
- 0
- 0