Мунньахха Ил Түмэн бэрэссэдээтэлин солбуйааччы Виктор Губарев, сис кэмитиэттэр бэрэссэдээтэллэрэ Алена Атласова, Феодосия Габышева, Иван Данилов, ситэриилээх былаас уорганнарын бэрэстэбиитэллэрэ, Саха сирин киинэ оҥорооччулара уо.д.а. кытыннылар.

Мунньах кыттыылаахтара өрөспүүбүлүкэ култуурунай эйгэтин, духуобунай сыаннастарын, омуктарын култуурунай уратыларын уонна патриотическай иитиини сайыннарыы уонна харыстааһын туһунан кэпсэттилэр.

Елена Голомарева Саха сиригэр 120 араас омук олорорун эттэ. Кини Саха сирин төрүт омуктарын ийэ тылларын, култуураларын уонна үгэстэрин сайыннарыы уонна харыстааһын – судаарыстыба бэлиитикэтэ буоларын тоһоҕолоото.

“Сыыппара технологиялар көмөлөрүнэн Саха сирин төрүт омуктарын туһунан мультипликациялаах уонна анимациялаах киинэлэри устуохпут. Манна олохтоох омуктар култуураларын, тылларын-өстөрүн, төрүт үгэстэрин туһунан көрдөрүөхпүт. Бу мультиктар иитэр-үөрэтэр, омук быһыытынан уратыбытын көрдөрөр ис хоһоонноох оҥоһуллуохтара. Ити оҕолорбут кыра саастарыттан бэйэлэрин төрүт култуураларыгар билэ-көрө, сыаналыы, харыстыы улааталларыгар көмөлөһүө”, – диэн Елена Христофоровна бэлиэтээтэ.   

Көрсүһүү кыттыылаахтара анимациялаах киинэлэргэ төрүт омуктар остуоруйаларын уонна хотугу тематиканы туһаныахха сөп диэн этии киллэрдилэр.

Бүтэһиккэ бары киирбит санаалары түмэн, мультиктары устууга сөптөөх этиилэр оҥоһуллуохтара диэн быһаарыы ылылынна.

Ил Түмэн пресс-сулууспатын матырыйаалынан.