Дэлэгээссийэ үлэлиир сырыытын ини-бии Малгиннар ийэлэрэ Февронья Николаевна Малгина пааматынньыгар сибэкки дьөрбөтүн уурууттан саҕалаата. Ол кэннэ норуот дьокутааттара “Баай-Ас” ТХПК сыаҕар, Баайаҕатаайы амбулаторияҕа, кулун тутарга “Демография” национальнай бырайыагынан үлэҕэ киириэхтээх, 80 миэстэлээх саҥа уһуйааҥҥа уонна Томтор сэлиэнньэтин этнокултуурунай комплексыгар сырыттылар.
Баайаҕа нэһилиэгин баһылыга Роман Романов эбийиэктэри көрдөрдө, итиэннэ саҥа амбулатория дьиэтин тутуутугар көмөлөһөллөрүгэр көрдөстө. Күн бүгүн үлэлии турар балыыһа олох өрдөтөөҕү тутуу. Ол курдук, өрөбөлүүссүйэ иннинэ 1915 сыллаахха тутуллубут. Онон быйыл 125 сыла. Баайаҕалар 4 куойкалаах саҥа амбулатория бырайыагын “ОлимпСтройпроект” ХЭУо оҥорторбуттар. Билигин онтулара судаарыстыбаннай экспертизаны ааһа сылдьар.
“Баай-Ас” ТХПК бэрэссэдээтэлэ Семен Андросов 300 кВт күүрүүлээх уот ситимигэр холбонуохтарын баҕаралларын эттэ. Хаһаайыстыба 2016 сыллаахха үүт сыаҕын, оттон 2018 сыллаахха эт сыаҕын үлэҕэ киллэрбит. Маны сэргэ кэпэрэтиип 250 ынах сүөһүнү көрө-истэ олорор. Семен Андросов: "Хаһаайыстыба “Саха сүөһүтэ” тэрилтэ састаабыгар киирэрэ буоллар", -- диэн баҕа санаатын эттэ.
Этнокултуурунай комплекс тутуутун хаамыытын кытта Борис Неустроев-Мандар Уус билиһиннэрдэ. Норуот дьокутааттара Моҕол Ураһа ис оҥоһуутун илэ көрөн сөхтүлэр. Билигин комплекс иһигэр Уустар түмэллэрин уонна балаҕаннарын оҥоро сылдьаллар. Яков Ефимов эбийиэк тутуутугар бүддьүөттэн эбии үбүлээһин көрүллэрин ситиһиэххэ наада диэн эттэ.
Салгыы дэлэгээссийэ нэһилиэнньэни кытта сирэй көрсөн олорон сытыы кыһалҕалары быһаарыста, дьон-сэргэ санаатын иһиттэ. Спикер Петр Гоголев бары киирбит этиилэри тус хонтуруолугар ыларын иһитиннэрдэ.
Ил Түмэн пресс-сулууспатын матырыйаалынан
-
0
-
0
-
0
-
0
-
0
-
0
