СӨ Экономикаҕа миниистирэ Майя Данилова сүрүн дакылааты оҥордо. Кини өрөспүүбүлүкэҕэ 34 социальнай эбийиэктэри техническэй көрүүнү-истиини тэрийээһиҥҥэ 22 бырайыак үлэлиирин туһунан эттэ. Бу уопсайа 6331 миэстэлээх оскуолалар, эбии үөрэхтээһин, оҕо сынньалаҥын, култуура уонна доруобуйа харыстабылын тэрилтэлэрэ уонна уһуйааннар буолаллар. Олорор дьиэлэргэ ититиини уонна уу ситимин, бөҕү сыбаалкаларга таһары хааччыйар 21 бырайыак үлэлиир. Итиэннэ биир тырааныспар өттүнэн бырайыак, ол эбэтэр Өлүөнэ өрүһү туоруур муостаны тутууга бырайыак үлэлиир.

Ол курдук, уопсайа 23 социальнай эбийиэк олоххо киирбит, уһуйааннарга 3081 миэстэ, оскуолаларга 1620 миэстэ аһыллыбыт.

Өрөспүүбүлүкэ бүддьүөтүгэр 2021 сылга уонна былааннаммыт 2022-2023 сылларга судаарыстыбаннай-чааһынай сыһыаннаах бырайыактары үбүлээһиҥҥэ уонна концессионнай сөбүлэһиигэ 8 млрд 984 мөл. солк. көрүллүбүт. Ол эбэтэр 2021 сылга – 2 млрд 614 солк., 2022 сылга – 2 млрд 843 мөл. солк., 2023 сылга – 3 млрд 491 мөл. солк.

Миниистир Майя Данилова ону сэргэ кэмигэр үлэҕэ киллэриллибэтэх кыһалҕалаах эбийиэктэр баалларын билиһиннэрдэ. Өрөспүүбүлүкэ үрдүнэн оннук 5 эбийиэк баар. Үөһээ Бүлүү, Бүлүү, Мэҥэ Хаҥалас, Үөһээ Дьааҥы улуустарыгар киириэхтээх оҕо саадтарын дьиэлэрэ.   

Билиҥҥитэ Дьокуускайга уонна куорат таһынааҕы сэлиэнньэлэргэ 12 үөрэх тэрилтэтин дьиэтин тутуулара бигэргэммит. Онно уопсайа 8380 үөрэх миэстэтэ тэриллиэҕэ.

Билигин үөрэх иккис симиэнэтин суох оҥорууга сорук турар. Ол инниттэн РФ Үөрэҕириитин министиэристибэтэ ВЭБ.РФ судаарыстыбаннай корпорацияны кытары РФ эрэгийиэннэрин ороскуотун сабарга эбии үбүлээһин саҥа быраабылатын оҥорбуттар. Ол курдук судаарыстыбаннай-чааһынай сыһыаннаһыынан оскуоланы тутууга РФ бүддьүөтүттэн быһа үбүлээһин көрүллэр буолуоҕа.

Майя Данилова эппитинэн, «Уһук Илин концессия» хайысхатынан РФ Бырабыыталыстыбата өрөспүүбүлүкэ бырайыактарын өйүөҕэ.

Миниистир социальнай суолталаах судаарыстыбаннай-чааһынай сыһыаннаһыынан олоххо киириэхтээх эбийиэктэри кытары билиһиннэрдэ. Ол курдук, Кангалассы бөһүөлэгэр орто анал үөрэх комплекса, Дьокуускайга уһун үйэлэнии киинэ, Гериатрия киинин 100 миэстэлээх иккис дьиэтэ уонна да атын. Бу бырайыактар федеральнай бүддьүөттэн эбии үбүлээһин оҥоһуллар эрэ буоллаҕына олоххо киирэр кыахтаахтарын туһунан Майя Данилова тоһоҕолоон бэлиэтээтэ.

СӨ Бырабыыталыстыбатын бэрэссэдээтэлин солбуйааччы Дмитрий Бердников Өлүөнэ өрүс нөҥүө муостаны тутуу бырайыактааһын үлэтин туһунан кэпсээтэ. Кини федеральнай бүддьүөттэн үбүлээһин боппуруоһа үлэ хаамыытын быһаарыаҕа диэтэ.  Билиҥҥи туругунан РФ үпкэ, тырааныспарка министиэристибэлэрин кытта техническэй уонна үбүлээһин боппуруостарынан үлэ ыытыллар.

Муостаны бырайыактааһыны «Институт Гипростроймост - г.Санкт-Петербург» оҥорор. Билигин тутуу бастакы түһүмэҕин бырайыактааһын үлэтэ ыытыллар. Докумуоннар Главмостэкспертиза көрүүтүгэр киирбиттэр. Муус устарга көҥүлү биэрэр быһаарыыны кэтэһэллэрин туһунан Дмитрий Бердников иһитиннэрдэ.

Тэрээһин түмүгэр норуот дьокутааттара иһитиннэрээччилэргэ ыйытыылары биэрдилэр. Вице-спикер Антонина Григорьева концессионер эбэһээтилистибэтинэн эрэгийиэн оҥорон таһаарар кээмэйигэр сыһыаннаан концессионер сөбүлэһиитинэн үбүлээһин хас бырыһыан буоларын ыйытта. Майя Данилова эппиэттээбитинэн, бу көрдөрүү 1% тэҥнэспит.  Норуот дьокутаата Владимир Прокопьев Өлүөнэ муостатын тутуута хабыллар сирдэригэр дьон бас билэр учаастактара төһө элбэҕин ыйытта. Виктор Федоров судаарыстыбаннай-чааһынай сыһыаннаһыынан бырайыактар иэстэрин сабыыга өрөспүүбүлүкэ бүддьүөтүттэн төһө үп көрүллэрин туһунан ыйытта.