Регламент саҥа эрэдээксийэтэ 2019 сыллаахха ахсынньы 12 күнүгэр бастакы ааҕыытыгар ылыныллыбыта.  Мандаакка уонна регламеҥҥа хамыыһыйатын бэрэссэдээтэлэ Андрей Николаев норуот дьокутааттарыттан 87 этии киирбитин туһунан билиһиннэрдэ. Элбэх этиини Ил Түмэн Бэрэссэдээтэлин солбуйааччы Александр Жирков, норуот дьокутааттара Виктор Федоров, Владимир Прокопьев, Андрей Николаев киллэрбиттэр.

Тустаах докумуон Ил Түмэн үлэтин уонна Регламент ис тутулун бэрээдэктиир сыалтан саҥардыллар.  Регламент саҥардыллыбыт бырайыага үс түһүмэхтэн, 20 бастан уонна 140 ыстатыйаттан турар. Саҥа бырайыак билиҥҥи докумуонтан уратыта диэн, хас биирдии ыстатыйа ааттаах, ол Ил Түмэн уорганнара үлэлииллэригэр көдьүүстээх буолуоҕа. Докумуоҥҥа уопсастыбаннай истиилэри, «Бырабыыталыстыба чаастарын”, “төгүрүк остуоллары”, кистэлэҥ куоластааһыны тэрийии бэрээдэгэ  ыйыллар. Итини тэҥэ, Регламеҥҥа Ил Түмэн  үлэтин саҥа формата,  саҥа мунньахтыыр уорганнар баар буолбуттар, бу парламент институттара уонна ыччат бэлиитикэтэ сайдыыларын кытта сибээстээх. Уларыйыы счетнай хамыыһыйа састаабын талыы быраабылатын эмиэ таарыйбыт.  Тустаах хамыыһыйа мунньаҕын түмүгүнэн, Регламент бырайыагын Ил Түмэн көрүүтүгэр эрэкэмэндээссийэлиир туһунан дьаһал ылылынна. Санатар буоллахха, XXVI уочараттаах пленарнай мунньах муус устар 7-8 күннэригэр буолар.