Ил Түмэн хонтуруоллуур кэмитиэтин бэрэссэдээтэлэ Евгений Перфильев 2019 сылга Саха Өрөспүүбүлүкэтигэр сокуону оҥоруу туругун туһунан Ил Түмэн уураҕын кытта билиһиннэрдэ.

2019 сылга Ил Түмэн 8 пленарнай мунньаҕы, парламент сэбиэтин 3 мунньаҕын ыыппыт. Маныаха 418 нормативнай правовой аакта ылыллыбыт, ол иһигэр 128 өрөспүүбүлүкэтээҕи сокуон бигэргэммит. Маны сэргэ 7 сүрүн сокуон уонна 295 парламент уурааҕа ылыллыбыттар.

2019 сыл устата Ил Түмэн сүрүн болҕомтотун судаарыстыбаннай былаас, олохтоох бэйэни салайыныы уорганнарын кыһалҕаларын быһаарыыга, гражданскай уопсастыбаны бөҕөргөтүүгэ, быыбардыыр уонна суут систиэмэлэригэр, уопсастыба куттала суох буолуутугар уонна бэрээдэккэ, хотугу аҕыйах ахсааннаах норуоттар сытыы кыһалҕаларыгар, бүддьүөт, сыана уонна тарыып бэлиитикэтигэр, нолуокка, приватизация сокуонун тупсарыыга, тулалыыр эйгэни харыстааһыҥҥа уонна экологияҕа, сир сыһыаннаһыылара уонна тыа хаһаайыстыбатын сайдыыларыгар, стратегическай былааннааһыҥҥа, инвестицияҕа, бырамыысыланнаска уо.д.а. өрөспүүбүлүкэ социальнай экэнэмиичэскэй сайдыытыгар быһаччы сыһыаннаах хайысхаларга уурбут.

Ил Түмэн социальнай сокуоннар тупсууларыгар күүскэ үлэлэспит. Ол курдук, парламентарийдар “элбэх оҕолоох ыал статуһун туһунан” сокуону тупсарбыттар. Онон элбэх оҕолоох ыал аатын 3-тэн элбэх уонна 18-гэр эбэтэр 23-гэр диэри саастаах оҕолордоох дьиэ кэргэн ылар кыахтаммыт.

Маны тэҥэ оҕо быраабын хааччыйыыга кэккэ сокуоннар ылыныллыбыттар.

Евгений Перфильев: “2019 сылга Ил Түмэн ситэриилээх былааһы, олохтоох бэйэни салайыныы уорганнарын, гражданскай уопсастыба институттарын кытта ыкса бииргэ үлэлэһэн, өрөспүүбүлүкэ стратегическай сыалларын уонна социальнай экэнэмиичэскэй сайдыытын соруктарын толорорго сөптөөх усулуобуйалары үөскэппитэ”, – диэн бэлиэтээтэ.