Муус устар 9-10 күннэригэр парламентарийдар Сылгы Ыытар, Сыбаатай уонна Эбээх нэһилиэктэригэр сылдьан дьону-сэргэни кытта көрүстүлэр. Көрсүһүүлэргэ Петр Гоголев уонна норуот дьокутааттара өрөспүүбүлүкэҕэ уонна федеральнай таһымҥа сокуону оҥоруу үлэ туһунан сырдаттылар.
Сыбаатай олохтоохторо 140 миэстэлээх саҥа оскуола саад тутуутун туруорустулар. Г.Г. Колесов аатынан Сыбаатай орто оскуолата 1978 сыллаахха тутуллан үлэҕэ киирбит. Онон өрдөтөөҕү дьиэ 80 % эргэрбит. 2010 сыллаахха Роспотребнадзор оскуола дьиэтэ хаарбах туруктааҕын бигэргэппит. Сыбаатайдар “Тыа сирин аныгы көстүүтэ” (“Современный облик сельских территорий”) диэн Арассыыйа бырагырааматыгар киирэн, 2022-2024 сылларга саҥа оскуола саад тутар былааннаахтарын биллэрдилэр.
Эбээх бөһүөлэгэр норуот дьокутааттара Халыма уездын Эҥэ оскуолатын 120 сыллаах үбүлүөйүгэр, кыраайы үөрэтэр түмэлгэ, “Өлөөкө Күөл” хаһаайыстыбаҕа сырыттылар. Бу хаһаайыстыба 300 ынах сүөһүлээх уонна 1000 кэриҥэ сылгылаах.
Эҥэ оскуолата Дьокуускай уонна Бүлүү духуобунай консисториятын ыйааҕынан 1901 сыллаахха төрүттэммит. 2020 сыллаахха Эбээх орто оскуолатыгар Халыма уездын норуот үөрэхтээһинин салаатын бастакы сэбиэдиссэйин Данил Степанович Слепцов аатын иҥэрбиттэр.
Эбээх нэһилиэгэр парламентарийдар саҥа амбулатория пуунун тутуутун уонна оскуола спортивнай саалатын өрөмүөнүн хаамыытын кытта билистилэр. Көрсүһүүгэ олохтоохтор “Өлөөкө Күөл” хаһаайыстыбаҕа саҥа хотон тутуутугар көмөлөһөллөрүгэр көрдөстүлэр.
Сылгы Ыытар нэһилиэк олохтоохторо хоту үлэлиир эдэр исписэлиистэри дьиэнэн-уотунан хааччыйыы бырагырааматын өссө кэҥэтэллэригэр этии киллэрдилэр. Ону тэҥэ саҥа оскуола тутуутун туруорустулар. Билигин оҕолор икки дьиэнэн үөрэнэ сылдьаллар. Ол курдук, өрдөтөөҕү оскуола умайан хаалбыт. Онон нэһилиэнньэ оскуола саад уонна кулууп тутуутун күүскэ туруоруста.
Маны таһынан, Орто Халыма улууһун олохтоохторун интэриниэт бытаана уонна төлөбүрүн сыаната ыарахана долгутар. Аны туран, хоту улуус дьоно сөмөлүөккэ билиэт сыаната сиэрэ суох үрдүгүн эттилэр. Холобур, Дьокуускайга диэри биир хайысхаҕа көтүү сыаната 34 тыс. солк. тэҥнэспит. Маны сэргэ сайыҥҥы өттүгэр сөмөтүөлүтнэн сырыы аҕыйаҕын уонна Орто Халыма аэропордун туруга мөлтөҕүн ыйдылар.
Өссө биир сүрүн кыһалҕанан – “Сбербаан” өҥөлөрө буолбут. Ол курдук, “Сбербаан” нэһилиэктэрдээҕи салааларын сабаталаан эбэтэр нэдиэлэҕэ 3-түү эрэ күн үлэлиирин үҥүстүлэр. Оттон интэриниэт бытаанын түмүгэр, хаартанан төлөһүү олус эрэйдээҕин эттилэр.
Бу курдук, Орто Халыма улууһун дьоно-сэргэтэ норуот дьокутааттарыгар сытыы кыһалҕаларын билиһиннэрдилэр.
- 0
- 0
- 0
- 0
- 0
- 0