Видео-кэмпириэнсийэ көрүҥүнэн буолбут мунньахха Уопсастыбаннай консультативнай сүбэ чилиэттэрэ, норуот дьокутааттара кытыннылар.
Ил Түмэн бэрэссэдээтэлэ Петр Гоголев СӨ Ил Дархана Айсен Николаев өрөспүүбүлүкэ Төрүт сокуонугар уларытыылары киллэриэхтээх конституционнай сокуон барылын 2021 сыл муус устар 30 күнүгэр оҥорон киллэрбитин туһунан эттэ.
Даҕатан эттэххэ, мунньах күнэ уһулуччулаах бэлитиичэскэй диэйэтэл Василий Васильевич Никифоров-Күлүмнүүр 155 сылын туолар күнүгэр лоп курдук сөп түбэстэ. “Бүгүҥҥү дьүүллэһии сүрүн тиэмэтэ дьон олоҕун хаачыстыбатын уонна судаарыстыбаннай былаас уорганнарын систиэмэтин сайдыыларыгар туһуланар”, – диэн Петр Гоголев бэлиэтээтэ.
Петр Васильевич конституционнай сокуон барыла киэҥ хабааннаах уопсастыбаннай дьүүллэһиилэри ааһа турарын бэлиэтээтэ. Муус устар 30 күнүгэр сокуон бырайыага Ил Түмэн официальнай саайтыгар тахсыбыт. Онтон ыам ыйын 7 күнүттэн көхтөөх дьүүллэһии саҕаламмыт. Ол түмүктэрин кытары ыам ыйын 21 күнүгэр конституционнай сокуон барылын аһаҕас истиилэригэр билиһиннэриэхтээхтэр. Онон Петр Гоголев Уопсастыбаннай консультативнай сүбэ чилиэттэрин дьүүллэһиигэ көхтөөхтүк кытталларыгар ыҥырда.
Сүрүн иһитиннэриини СӨ Ил Дарханын уонна Бырабыыталыстыбатын дьаһалтатын, конституционнай сокуон сүнньүнэн этиилэри хомуйар үлэлиир бөлөх салайааччыта Афанасий Владимиров оҥордо.
Кини сокуон бырайыага СӨ Төрүт сокуонун кэккэ балаһыанньаларын тупсаран биэриигэ туһуланалларын бэлиэтээтэ. Афанасий Владимиров докумуон норуот дьокутааттарын, Уопсастыбаннай палаата, өрөспүүбүлүкэ профсойуустарын федерациятын чилиэттэрин бары этиилэрин учуоттаан оҥоһуллубутун эттэ.
Саха Өрөспүүбүлүкэтин Конституционнай суутун урукку суудьуйата, Конституционнай суут научнай-консультативнай сүбэтин бэрэссэдээтэлэ, юридическай билим дуоктара, бэрэпиэссэр Дмитрий Миронов сокуон бырайыагын уратытын уонна туох соруктары быһаарарын кэпсээтэ.
Салгыы Уопсастыбаннай консультативнай сүбэ чилиэттэрэ Макар Яковлев, Егор Ларионов, Евгения Михайлова, Вячеслав Александров сокуон барылыгар уонна саҥа өйдөбүллэргэ сыһыаннаах боппуруостары биэрдилэр.
Ил Түмэн I Ыҥырыылаах Мунньаҕын Өрөспүүбүлүкэ палаататын бэрэссэдээтэлэ Егор Ларионов конституционнай сокуон барыла үрдүк таһымнаахтык оҥоһуллубутун эттэ. Кини СӨ Бырабыыталыстыбатын үлэтин Ил Дархан хонтуруоллуурун туһунан көннөрүү киирэрин өйүүрүн биллэрдэ.
Өрөспүүбүлүкэ парламенын II Ыҥырыылаах Мунньаҕын дьокутаата, 2003-2010 сылларга доруобуйа харыстабылын миниистирэ Вячеслав Александров нэһилиэнньэ сөптөөх эмтээһининэн хааччыллыытыгар былаас уорганнара эппиэтинэһи сүгэллэрин туһунан балаһыанньа Төрүт сокуоҥҥа киирэрин биһириибин диэтэ.
Бу курдук, мунньах кэмигэр араас ыйытыылар уонна этиилэр киирдилэр. Түмүккэ Уопсастыбаннай консультативнай сүбэ Төрүт сокуоҥҥа киириэхтээх көннөрүүлэри өйүүрүн биллэрдэ.
Мунньах туһунан сиһилии https://iltumen.ru/news киирэн ааҕыаҥ.
Ил Түмэн пресс-сулууспатын матырыйаалынан.
-
0
-
0
-
0
-
0
-
0
-
0
