Дьокуускайтан Москваҕа уонна Санкт-Петербурга көтөн барыыны субсидиялыыр туһунан Ил Түмэн вице-спикерэ, “Биир ньыгыл Арассыыйа” фракциятын салайааччыта Антонина Григорьева туруорсубута. Кини көрдөһүүтүн РФ Тырааныспарга министиэристибэтэ ылынан, тустаах суругу РФ Бырабыыталыстыбатыгар киллэрбитин туһунан бу ыам ыйын 18 күнүгэр Антонина Афанасьевнаҕа Госдума тырааныспарга уонна тутууга кэмитиэтэ биллэрдэ.

Вице-спикер Антонина Григорьева кэпсээбитинэн, “Биир ньыгыл Арассыыйа” фракцията, кини салалтатынан, бу дьыл кулун тутар 11 күнүгэр бу баартыйа Генеральнай сэбиэтин сэкирэтээригэр, Федеральнай Мунньах Федерацияҕа Сэбиэтин Бэрэссэдээтэлэ Андрей Турчак аатыгар, эбии харчы көрөллөрүгэр көрдөһөн, сурук ыыппыттар.

 Сурукка сүрүн тирэх оҥостубут докумуоннара – РФ Бырабыыталыстыбата 2018 сыл кулун тутар 2 күнүгэр 215-с №-дээх «Об утверждении Правил предоставления субсидий из федерального бюджета организациям воздушного транспорта в целях обеспечения доступности воздушных перевозок населению и о признании утратившими силу некоторых актов Правительства Российской Федерации» уурааҕар киирбит уларыйыылар. Ити уларыйыылар, сүрүннээн, Уһук Илик түөлбэтигэр салгын тырааныспарынан көтүү нэһилиэнньэҕэ табыгастаах буоларыгар туһаайыллыбыттара. 2021 сыл тохсунньу 16 күнүгэр буолбут Госсовет уонна Стратегическай сайдыыга уонна национальнай бырайыактарга сэбиэт мунньаҕар РФ Бэрэсидьиэнэ толоро охсоллоругар сорудахтаабыта.

Бу көрүллэр субсидия үчүгэйэ диэн, Уһук Илин эрэгийиэҥҥэ олорооччулар бары, пропискалаах буоллахтарына, саастарыттан тутулуга суох туһанар бырааптаналлар. Аны, Дьокуускайтан эрэ буолбакка, Мииринэй, Удачнай, Нерюнгри куораттартан эмиэ Москваҕа уонна Санкт-Петербурга чэпчэтиилээх билиэтинэн айанныыр гына туруорсубуттара.

Ол эрээри Росавиация саайтыгар тахсыбыт испииһэккэ Дьокуускай сотуллубут этэ. Хата, Мииринэй, Удачнай (“Полярнай”), Нерюнгри аэропортарыттан көтөөччүлэргэ федеральнай бүддьүөттэн үп көрүллүбүтэ. Дьокуускайы туораппыт төрүөттэрэ – бүддьүөт эбэһээтэлистибэтигэр лимииттэрэ, атыннык эттэххэ, үптэрэ-харчылара тиийбэтэх.

 Дьиҥэр, Дьокуускайыҥ диэн Арассыыйа Федерациятын саамай улахан иэннээх субъегын киин куората буоллаҕа эбээт. Манна 323 тыһыынчаттан тахса киһи олорор. Аны туран, улуустар үксүлэрэ соҕуруу Дьокуускай аэропордуттан көтөллөр. Манна даҕатан эттэххэ, Саха Өрөспүүбүлүкэтэ бастакынан тыл көтөхпүтэ – Уһук Илин уокуругун олохтоохторо салгын тырааныспарынан туох да эрэйэ-мэһэйэ суох удамыр сыанаҕа сылдьалларыгар анаан федеральнай бүддьүөттэн үп көрүллэригэр. Уонна кэлэн, бэйэбит тэбиллэн хаалбыппыт, Дьокуускайбытын испииһэктэн сотон кэбиспиттэрэ.

         РФ Бырабыыталыстыбатын 2018 сыл кулун тутар 2 күнүнээҕи 215-с №-дээх «Об утверждении Правил предоставления субсидий из федерального бюджета организациям воздушного транспорта в целях обеспечения доступности воздушных перевозок населению и о признании утратившими силу некоторых актов Правительства Российской Федерации» уурааҕар ырылхайдык сурулла сылдьар: субсидиянан туһаныы 5 млрд. солк. сууматтан аһары барар түгэнигэр, тустаах авиа-тэрилтэлэр сайаапкаларыгар ыйбыт хайысхаларынан, Быраабыла 5-с нүөмэрдээх сыһыарыытыгар олоҕуран, уочарытанан дуогабардаһаллар диэн.

Оннук талыы түмүгэр, Уһук Илин куораттарыттан Москваҕа диэри инники турбут 12 хайысха субсидияҕа хабыллыбыт. Арай Читаттан уонна Дьокуускайтан эрэ барыылар киирбэтэхтэр. Санкт-Петербурга көтүү эмиэ. Маныаха тугунан сирдэтиннэрэн итинник быһаарбыттара мунаах боппуруоһу үөскэппитэ.

Үөһэ этиллибиттэргэ төрүөттэнэн, СӨ Судаарыстыбаннай Мунньаҕын дьокутааттара сурукка эрэгийиэннээҕи уонна олохтоох авиа-тиэйиини эбии үбүлүүргэ, итиэннэ испииһэккэ “Дьокуускай–Москва-Дьокуускай” уонна “Дьокуускай–Санкт-Петербург–Дьокуускай” хайысхалары киллэрэргэ эппиттэрэ.

Госдума туһааннаах кэмитиэтэ бу суругу муус устар 5 күнүгэр РФ Тырааныспарга министиэристибэтигэр ыыппыт. Онуоха федеральнай министиэристибэ “Дьокуускай–Москва-Дьокуускай” уонна “Дьокуускай–Санкт-Петербург–Дьокуускай” хайысхалары субсидиялыырга эбии ассигнование көрүллэрэ оруннааҕын бэлиэтээбит.

Ол кэнниттэн субсидиялааһын салгыы тэрийэр туһунан мунньах РФ Бырабыыталыстыбатын I солбуйааччыта Андрей Белоусовка буолбута. Онно бу сурук бэбиэскэҕэ туран, 2,5 млрд солк. үп эбии көрүллэрин, “Дьокуускай – Москва – Дьокуускай” уонна “Дьокуускай – Санкт-Петербург – Дьокуускай” хайысхалар субсидияланалларын ситиһэргэ соруммуттара. Мунньах  боротокуолугар олоҕуран, ити этиини РФ Бырабыыталыстыбатын көрүүтүгэр киллэрдилэр. Бигэргэттэхтэринэ, дьэ, улахан абырал уонна кыайыы буолуо этэ.