Бу сессия РФ Федеральнай Мунньаҕын Федерацияҕа Сүбэтин, РФ Бырамыысыланнаска уонна атыыга-эргиэҥҥэ министиэристибэтин өйөбүллэринэн тэрилиннэ. Санаа атастаһыытын түһүлгэлэригэр Арассыыйа уонна аан дойду эспиэрдэрэ тыл эттилэр, эспиэрдэр сессиялара уонна воркшоптар буолан аастылар.

Форум кыттыылаахтара дьахтар менеджменин көдьүүһүн, үөрэх уонна доруобуйа харыстабылын кыһалҕаларын  быһаарыы, үрдүк технологиялар уонна сыыппаралааһын сайдыытыгар дьахталлар кылааттарын, о.д.а. социальнай хайысхалаах тиэмэлэр тула кэпсэттилэр, санаа атастастылар.

Пленарнай мунньаҕы Федерация Сүбэтин бэрэссэдээтэлэ, Дьахталлар иккис евразийскай форумнарын тэрийээччи Валентина Матвиенко салайан ыытта. Кини бастакы форум үлэтин түмүгүнэн, РФ Бэрэсидьиэнин сорудаҕынан, дьахталлар интэриэстэрин көмүскүүр национальнай стратегия ылыллыбытын кэпсээтэ. Бу стратегия 2022 сылга диэри Арассыыйа дьахталлара бэйэлэрин испэсэлиис быһыытынан сайыннаралларыгар, үлэ ырыынагар толору күрэстэһэр кыахтаналларыгар, урбаанынан дьарыктаналларыгар, экэниэмикэ үрдүк технологиялаах эйгэтигэр үлэлииллэригэр тустаах усулуобуйалары олохтуохтаах.   

“Бүгүн Арассыыйа аан дойду дьахталларын олоҕор биллэрдик сабыдыаллыыр. Дойдубут дьахтар уобараһын бүтүн аан дойдуну сайыннарар күүс быһыытынан көрдөрөр”, – диэн Валентина Матвиенко бэлиэтээтэ.

Бу форумҥа Киргизия, Узбекистан, Германия, Франция, Индия, Индонезия, Австралия уонна ЮАР бэрэстэбиитэллэрэ кытыннылар.

Форум бырагырааматын мана көрүөххэ сөп.

Санаттахха, дьахталлар иккис евразийскай форумнара ыам ыйын 24-25 күннэригэр буолар.