Виктор Николаевич Геннадий Зюганов Владимир Путиҥҥа суруйбут аһаҕас суругун ис хоһоонун кытары билиһиннэрдэ:

--Бэрэсидьиэҥҥэ туһаайыллыбыт аһаҕас суругар Геннадий Зюганов хомуньуус баартыйа дойду бэлиитикэтин уонна социальнай-экэнэмиичэскэй балаһыанньатыгар туох санаалааҕын сааһылаан эппит. Онуоха ханнык боппуруостар таарылынныларый? АХШ уонна НАТО Арассыыйа утары ыытар дьайыытын түмүгэр, дойду ис ырыынага мөлтөөн, нэһилиэнньэ дьадайыы кирбиитигэр тиийдэ. Баай уонна дьадаҥы араҥаларын арахсыыта улаатан иһэр. 90-с сылларга Арассыыйа аан дойду ырыынагар оҥорон таһаарыытын көрдөрүүтэ 9% эбит буоллаҕына, билигин бу көрдөрүү 2%-ҥа эрэ тэҥнэһэр. 10 сыл иһигэр экэниэмикэбит 0,9% эрэ улаатта.

 Геннадий Зюганов биллэр экэнэмиистэр этиилэрин холобурдаабыт. Кинилэр ССРС  эстибитин кэннэ олохтоммут экэниэмикэ бүгүҥҥү күҥҥэ сөбө суоҕун, төттөрүтүн таҥнары түһүүгэ тиэрдэрин тоһоҕолоон бэлиэтээбиттэр. Ол кырдьык. Олохпут укулаата, сайдыыта ону толору туоһулуур, дакаастыыр. Ол иһин Зюганов суруйбут: «Өскөтүн экэниэмикэбит сайдар суола олигархтар тутан олорор корпорацияларын салайыыларынан салгыы салаллан бардаҕына, аны 5-10 сылынан букатыннаахтык дьадайабыт, ол оборчоттон оронон тахсарбыт уустук буолуоҕа».

Геннадий Андреевич Бэрэсидьиэҥҥэ бэйэбит наукабытын уонна оҥорон таһаарыы салааларын сайыннарыахтаахпытын санатар. Кини бырамыысыланнас судаарыстыба өттүттэн сөптөөх өйөбүлэ суоҕун ыйар. Холобур быһыытынан пандемия кэмигэр тэрилтэлэргэ уот тарыыба улааппытын аҕалар. Геннадий Зюганов дойду эрэгийиэннэрэ киинтэн умналаһан кэриэтэ олороллорун бэлиэтиир. Субъектарга үп аҕалар улахан тэрилтэлэрин атыылыырга күһэйэллэрин туһунан этэр.

Маны таһынан аһаҕас суругар дойдуга бүтэһик кэмҥэ инфляция үүнэ-тэһиинэ суох үрдүүрүн таарыйар. Ол барыта улахан социальнай кириисискэ аҕалыан сөбүн сиһилии быһаарар. Зюганов ас-үөл ырыынага тыа хаһаайыстыбатын салаатын өйөөтөхтөрүнэ эрэ бигэ туруктаах буолуоҕун туһунан этэр.

Сурукка демография боппуруоһа көтөҕүллүбүтүн, дойду сүрүн салаалара судаарыстыба бас билиитигэр буолуохтаахтарын, хамнас алын кээмэйэ үрдүөх тустааҕын, бүгүҥҥү чахчыларынан дойду хас сэттис олохтооҕо дьадаҥы киһи ахсааныгар киирсэрин туһунан этиллибит.

Аһаҕас суругар Геннадий Зюганов судаарыстыба бэлиитикэтэ олигархтарыгар олоҕурарын, ол дойдуну сайыннарбатын ырылхайдык ыйбыт. Билиҥҥи туругунан миллиардердарбыт дойду 37,5 триллион суумалаах активын  бас билэн олороллор.

Дойду эрэсиэрбэтигэр баар үбү, атын сайдыылаах дойдулар курдук, мэдиссиинэни, социальнай эйгэни, национальнай экэниэмикэни сайыннарыыга ыытар наадалааҕын этэр.

Маны таһынан аһаҕас суругар кылаабынай хомуньуус ыччаты патриотическай тыыҥҥа иитии кыһалҕаларын, Арассыыйа бөдөҥ держава быһыытынан өйдөбүлүн халбарыҥната сатааһыны утары үлэ барыахтааҕын, биэнсийэ реформатын хаттаан көрүллэр тоҕоостооҕун туһунан суруйбут. Дойду салалтата Арассыыйа кэскилин иннигэр эппиэтинэһи сүгэрин санатан туран, “дьон саҥатын, кыһалҕатын ылынан, кинилэр интэриэстэрэ көмүскэллээх буоларыгар үлэлиэхтээххит” диэн этиинэн суругун түмүктээбит .

Брифинг кыттыылаахтара санааларын эттилэр. КПРФ фракциятын чилиэнэ Семен Никитин аһаҕас сурук киэҥник ырытыллан, дойду салалтатын үлэтигэр ханнык эмэ хамсааһыны аҕалыахтааҕын туһунан эттэ. Суруналыыс Елена Кузьмина баартыйа Судаарыстыбаннай Думаҕа нэһилиэнньэ олоҕун таһымын тупсарарга туһуламмыт ханнык сокуоннары киллэрбитин ыйытта. Маныаха Виктор Губарев: “Хомуньуустар оҥорон киллэрэр үгүс сокуоннара ылыллыбат”, -- диэн кырдьыгынан билиннэ. Кини КПРФ фракцията хас да сыл устата «Сэрии сылларын оҕолорун туһунан» сокуон барылын бэлэмнээн киллэрэн туруорсубутун, ону да ылымматахтарын холобур аҕалла. Доруобуйа харыстабылын салаатыгар сарбыйыы (оптимизация) саҕаламмытыгар, ону утаран, сокуон барылыгар үгүс көннөрүү  киллэрбиттэрин ылымматахтарын кэпсээтэ. «РФ үөрэҕин туһунан», «Оҕо аймах туһунан» сокуоннарга тустаах баартыйа 180 көннөрүүнү киллэрбититтэн ханныгын да бигэргэппэтэхтэр.

Брифиҥҥэ фракция улуустааҕы салааларын салайааччылара кытыннылар. Өлүөхүмэ оройуоннааҕы салаатын бастакы сэкирэтээрэ Юрий Тимофеев Геннадий Зюганов Бэрэсидьиэҥҥэ аһаҕас суруга норуот бүгүҥҥү олоҕо тыҥаабытын туоһутунан буоларын эттэ. Кини ханнык баҕарар салааҕа бүрүкэрээтийэ диэн көстүү олус сытыырхайбытын бэлиэтээтэ.

 Кэпсэтии түмүгэр Виктор Губарев КПРФ киин кэмитиэтин бэрэссэдээтэлэ, фракция салайааччыта Геннадий Зюганов РФ Бэрэсидьиэнэ Владимир Путиҥҥа «Выполнить волю народа – сменит курс» диэн аһаҕас суруга туох эмэ түмүктээх буолуоҕар, умнууга хаалбатыгар бүк эрэллээҕин биллэрдэ.