Сокуон барылын бастакы ааҕыыга СӨ үлэҕэ уонна социальнай сайдыыга миниистирэ Елена Волкова билиһиннэрдэ. Ил Түмэн оҕо аймах уонна дьиэ кэргэн дьыалаларыгар сис кэмитиэтин бэрэссэдээтэлэ Алена Атласова сокуон барылын бастакы ааҕыыга өйүүллэригэр ыҥырда. Кини сөптөөх уларыйыылар киирбиттэрин ыйда. Ол гынан баран, иккис ааҕыыга 65-тэн аҕа саастаах дьону тыа сириттэн мэдиссиинэ тэрилтэлэригэр суһаллык аҕалан биэрии өҥөтүн саҥардыллыбыт балаһыанньатын туһунан сиһилии хоруйдууругар көрдөстө. Алена Николаевна өрөспүүбүлүкэҕэ 185 кытыы нэһилиэк уонна 163 производственнай учаастак баарын санатта. “Улуус аайы мобильнай биригээдэлэр суохтар. Өскөтүн биһиги бу сокуону ылынар буоллахпытына, тыраапыспар ханнык көрүҥэ туһаныллара ыйыллара наада”, – диэн бэлиэтээтэ.    

Елена Волкова мобильнай биригээдэлэр 2019 сылтан үлэлииллэрин эттэ. Бу биригээдэлэр дьону диспансеризацияҕа уонна профилактическай көрдөрүүгэ аҕалар сыаллаахтарын ыйда. Миниистир маннык биригээдэлэр ыарыһахтары массыынанан тиэрдэллэрин туһунан сокуоҥҥа суруллубутун хоруйдаата.

Хос дакылааты Владимир Чичигинаров оҥордо. Кини сокуон барылын бастакы ааҕыыга ылыналларыгар уонна бары этиилэри учуоттаан XXIX уочараттаах пленарнай мунньахха хос көрөргө этии киллэрдэ. Санаттахха, аныгыскы уочараттаах мунньах бэс ыйын 30 күнүгэр уонна от ыйын 1 күнүгэр ыытыллара былааннанар.

Бу сокуон барылын Ил Дархан өйөөбүт. Куоластааһын түмүгүнэн докумуон бастакы ааҕыыны ааста.