Сүрүн дакылааты оҥорбут бырамыысаланнас миниистирэ Максим Терещенко бу сокуон барыла өрөспүүбүлүкэҕэ гаас уматык ырыынагын сайыннарарга ананарын бэлиэтээтэ. Ол курдук Саха Өрөспүүбүлүэктин территориятыгар инвестбырайыактары олоххо киллэрэргэ судаарыстыба уонна муниципалитетар бас билиилэригэр сылдьар сир учаастактарын, олохтоммут бэрээдэги инвестбырайыактарга сөп түбэһиннэрэн уларытан, түүлэһиигэ туорга таһаарбакка бэриллиэхтээх. Ыгыллыбыт айылҕа гааһын, ыгыллыбыт углеводород гааһын уонна компримированнай айылҕа гааһын оҥорорго итиэннэ туһаҕа таһаарарга анаммыт эбийиэктэр ситимнэрин сайыннарыыга туһаайыллыбыт инвестбырайыактар үлэ миэстэтин элбэтэр, экология өттүнэн ыраас уонна удамыр сыаналаах уматыгынан хааччыллар уонна гаас киллэриллибэтэх сирдэригэр «күөх оттугу» туһанар кыаҕы биэриэхтэрэ. Арассыыйа Федерациятын 26 субьектарыгар (Москва, Ростов, Белгород, Волгоград, Нижегород, Тула, Курскай, Калининград, Кострома, Курган, Липецкай, Пенза, Псков, Тверь, Сахалин, Смоленскай, Ярославскай уобаластарга, Пермь, Алтай, Хабаровскай кыраайдарга, Башкортостан, Чувашия, Татарстан, Удмуртия, Алтай өрөспүүбүлүкэлэригэр, Санкт-Петербурга) маннык эбийиэктэри тутууга сир учаастактара туордаммакка бэриллэллэр. Тоҕо диэтэххэ, бу эрэгийиэннэр массыына уматыгар гааһы туһаныыны сайыннарыыга Бырабыыталыстыба ыйааҕынан 2019 сыл ахсынньы 11 күнүгэр бигэргэммит Арассыыйа Федерациятын субьектарын испииһэгэр киллэриллибиттэрэ, онон сыл аайы тустаах субсидиянан туһаналлар. Дьүүллэһии түмүгүнэн дьокутааттар сокуон барылын бастакы ааҕыынан ылынарга быһаардылар.