«Биир ньыгыл Арассыыйа” баартыйа анаан-минээн тэрийэн ыыппыт мунньаҕар РФ тутаах министиэристибэлэрин  уонна профсойуустарын бэрэстэбиитэллэрэ кыттыыны ылбыттар. Бастакытынан, баартыйа бүддьүөт үлэһиттэрин хамнастарын акылаатын өлүүтүн үрдэтэргэ  уонна  эбии төлөбүрү көрөргө (компенсационнай) аналлаах биир кэлим испииһэги оҥорорго этии киллэрдэ.  «Кэтээн көрбүппүтүнэн үгүс эрэгийиэннэргэ  быраастар уонна учууталлар хамнастарын акылаата оннооҕор хамнас алын кээмэйиттэн (МРОТ) кыра эбит.  Онон ыам ыйдааҕы Ыйааҕы  салайааччылар толорор инниттэн үлэ ставкатыгар чааһы эбиинэн дьарыктаналлара баар суол. Ол курдук, учууталлары 1,5-2 ставкаҕа үлэлэтэргэ күһэллэллэр. Оттон быраастарга эбии дьуһуурустубаны соҥнууллар. Ол иһин, барыта дьэҥкэтик көстүөхтээх диэнинэн салайтаран, хамнас боппуруоһун кэмигэр уһаппакка-кэҥэппэккэ быһаарыахпытын наада», -- диэн Андрей Турчак санаатын эттэ. РФ Үлэҕэ министиэристибэтэ иһитиннэрбитинэн,   тустаах сокуоҥҥа уларытыы киирэр түгэнигэр  эрэгийиэннэр хамнас усулуобуйатын быһаараллара судургутуйарын ааһан,  хамнас систиэмэтин үлэтэ барыта дьэҥкэтик көстөр буолуохтаах эбит. РФ Госдуматыгар «Биир ньыгыл Арассыыйа» фракциятын салайааччыта Сергей Неверов тустаах сокуон барыла  эрэгийиэннэр дьүүллэһиилэригэр бэриллибитин туһунан эттэ.