Бу күннэргэ биэдэмистибэ уопсастыбаннай Сэбиэтин бэрэсэдээтэлэ Михаил Черосов Таатта улууһун Кыйы нэһилиэгин түмэлигэр компьютер техникатын биэрбитин элбэх оҕолоох ыалларга быстах кэмҥэ туһанарга аныахтара. Михаил Михайлович кэпсииринэн кини көҕүлээһинигэр биир дойдулаахтара  - Дьокуускайга Таатта биир дойдулаахтарын бэрэстэбиитэлэ Семен Оготоев уонна DNS маҕаһыын салайааччыта, Тыараһа орто оскуолатын бүтэрээччитэ Михаил Лебедев кыттыстылар. «Көҕүлээһини бэрт түргэнник тэрийбиппит. Мин санаабар,  акцияҕа салгыы биһиги дойдулаахтарбыт көхтөөхтүк кыттыһыахтара. Үлэни олус чэпчэкитик уонна түргэнник ыытыахха сөп эбит», — диэн Михаил Черосов бэлиэтиир.

Маны таһынан, сүдү улахан көмөнү «Якутцемент» АУо генеральнай директора, норуот дьокутаата Мамедов Алиш Забид Оглы оҥордо. Кини Хаҥалас улууһун оҕолоругар 23 планшет бэлэх туттарда. Бастакынан аадырыстаах көмөнү 2 №-дээх Покровскай орто оскуолатын 9 кылааһын үөрэнээччитэ Роман Широких туһанна.

«Роман элбэх оҕолоох ыаллар оҕото. Биһиги оскуолабытыгар быраатын Русланы кытта бииргэ үөрэнэллэр. Үөрэҕэр кыһаллар, урут робототехниканан дьарыктанара. Быйыл эксээмэннэри туйгуннук туттарар былааннаах. Тэрийээччилэргэ уонна норуот дьокутаатыгар Алиш Забид Оглыга махталбытын тиэрдэбит, - диэн 2 №-дээх Покровскай орто оскуолатын директоры солбуйааччы Мария Ефимова этинэр.

 «Акция тэрийээччилэригэр улахан махталбытын тиэрдэбин», —диир Руслан Широких. – Мантан салгыы ОГЭ бэлэмнэнэргэ интэриэһинэй уонна табыгастаах буолуо». Руслан быйыл судаарыстыбыннай эксээмэннэри туттарар, предметтэринэн быһаарынан физиканы уонна информатиканы талбыт.

Бэлиэтээн этэр буоллахха, «Дьиэҕэ үөрэнэргэ көмөлөс» Бүтүн Арассыыйатааҕы акцияны Стратегияҕа көҕүлээһинэ агенствотын кытта РФ Үөрэх министиэристибэтэ уонна «Биир ньыгыл Арассыыйа» партия көҕүлээн ыыталлар. Акцияҕа бастакынан СӨ Үөрэх уонна наука миниистирэ Владимир Егоров кыттыспыта. Кини Дьокуускайга элбэх оҕолоох Семеновтар дьиэ кэргэттэригэр ноутбук бэлэхтээбитэ. Миниистир Саха сирин олохтоохторун туһалаах уонна хас биирдии ыалга  наадалаах акцияҕа көхтөөхтүк кытталларыгар ыҥырар. Бу акцияҕа өрөспүүбүлүкэ бары муннугуттан урбаанньыттар, үөрэх управлениелара уонна муниципальнай тэриллиилэр көхтөөхтүк кыттыыны ылаллар. Акцияҕа компьютер техникатын биэрэр кыахтаах ким баҕалаах кыттыан сөп. Сайаапканы https://помогиучитьсядома.рф/ хаалларыахха сөп.