Мантан ыла РФ Бырабыытылыстыбата судаарыстыбаннай уонна муниципальнай тэрилтэлэр үлэһиттэрин акылааттарын уонна үлэҕэ көҕүлүүр төлөбүрдэрин быһаччы олохтуур буолуоҕа. Саҥа быраабылалар ханнык эйгэлэргэ киирэллэрин миниистирдэр кабинеттара быһаарыаҕа. Ону тэҥэ олоххо киирэр болдьохторун чопчулуоҕа.

Докумуон быһаарыы суругар, көннөрүүлэр хас биирдии эйгэ уратыларын учуоттуохтара диэн бэлиэтэнэр. Маннык дьаһал сүрүн сыалынан араас эрэгийиэннэргэ биир эйгэҕэ үлэлиир дьон хамнастарын кээмэйин биир халыыпка киллэрии буолар.

РФ Үлэҕэ миниистирэ Андрей Пудов саҥа дьаһал үлэһиттэр хамнастарын үрдэтиэ диэн мэктиэлиир. Кини этэринэн, хамнаһы бэрээдэктээһин мэдиссиинэ эйгэтиттэн саҕаланар үһү. “Саҥа миэрэ эрэгийиэннэр бүддьүөттэригэр эбии ноҕурууска буолуо суоҕа. Ороскуоттары федеральнай бүддьүөт уйунуо”, – диэн бэлиэтиир.

– 90-с сылларга дойдуга биир кэлим тарифнай сиэккэ үлэлээбитэ. Манан бүддьүөт үлэһиттэрин 14 араҥаҕа араараллара. Гиперинфляция кэмигэр ити араҥаларга барыларыгар автоматически хамнастара үрдүүрэ. Ким да умнуллубакка хаалара. Ол гынан баран, сиэккэ элбэх итэҕэстээҕэ. Ол түмүгэр, үлэтэ тохтотуллубута. Билигин хамнас кээмэйин эрэгийиэннэр бэйэлэрэ быһаараллар. Ол иһин эрэгийиэн аайы биир эйгэ үлэһиттэрин хамнастара улаханнык араастаһар. Онон саҥа көннөрүүлэр хамнас төлөбүрүн биир өйдөнүмтүө систиэмэтин олохтуохтара, – диэн “Биир ньыгыл Арассыыйа” баартыйа фракциятын баһылыгын I солбуйааччыта Андрей Исаев бэлиэтээтэ.