Владимир Чичигинаров “Арассыыйаҕа сэдэх ыарыылаах дьоҥҥо мэдиссиинискэй-социальнай көмөнү тэрийии уонна бу хайысханы сайыннарыы түмүктэрэ” диэн тиэмэҕэ дакылааттаата. Онно кини чопчу диагнозтара да биллибэт, ситэ үөрэтиллэ илик орфаннай ыарыылаах дьону эминэн хааччыйыы кыһалҕаларын таарыйда.

--Саха Өрөспүүбүлүкэтигэр босхо эминэн туһанааччы ахсаана 190 тыһ. киһи. Бу нэһилиэнньэ 20%-гар тэҥнэһэр. Онуоха 2021 сылга 2 млрд. 800 мөл. солк. көрүллүбүтэ.

Итинтэн 558 мөл. 209,3 тыһ. солк. федеральнай чэпчэтиинэн туһанар 38 676 киһиэхэ, 2 млрд. 053 млн. 435,1 тыһ. солк. эрэгийиэннээҕи чэпчэтиинэн туһанар  100 323 киһиэхэ үллэриллибитэ, -- диэн кэпсээтэ.

Кини эппитинэн, өрөспүүбүлүкэ эминэн хааччыйыыга көрөр үбүн 24%-на, ол эбэтэр 627 мөл солк., сэдэх (орфаннай) ыарыылаахтарга тыырыллар. Ону 184 улахан киһиэхэ уона 41 оҕоҕо барыыллар. Тэҥнээн көрөр буоллахха, итиччэ кэриҥэ суума 38 тыһыынчаттан тахса федеральнай чэпчэтиинэн туһанар дьоҥҥо түҥэтиллэр. Онон олус ороскуоттаах, өрөспүүбүлүкэ хааһыната хааччыйар кыаҕа суох. Былырыын бу салааҕа бүддьүөппүт 605 мөл. сөл. дэписсииттэммит, ол эбэтэр ночооттоммут. Онон парламентарий орфаннай ыарыылаах дьон эмтэрин үбүлээһин федеральнай бүддьүөттэн көрүллүөн наадатын эттэ.