-Ил Дархан Айсен Николаев 2021 сылтан тыа хаһаайыстыбатын салаатыгар саҥа мэхэньиисимнэр үлэлиэхтэрэ диэн чопчулаан эттэ. Эһиил ити сыалга 4,115 млрд солкуобай көрүлүннэ. Харчыны тыа сирин олохтоохторо, сүөһүлээх дьон ылыахтара диэтэ.

Кэтэх хаһаайыстыбалаах дьоҥҥо ыанньык сүөһү аайы 35 тыһ солкуобай көрүллэр, тэрээһиннээхтэр үүттэрин 60 солкуобайга туттарыахтара. Итинтэн 50 солкуобайын өрөспүүбүлүкэ уйунуо, 10-ун соҕотуопкалааччы. Онон тэрээһиннээх хаһаайыстыбаларга үүт харчыта үрдүөҕэ. Ону таһынан соҕотуопкалааччылары уонна улуустар дьаһалталарын кэтэх ыаллар үүттэрин ырыынак сыанатынан тутарга саҥа систиэмэни олохтуулларыгар ыҥырда. Кэтэх хаһаайыстыбалаахтар кыттыһан, кэпэрэтиип тэриниэхтэрин сөбүн Ил Дархан бэлиэтээтэ.

Манна даҕатан эттэххэ, бу тыа хаһаайыстыбатын салаатыгар кэккэ уларыйыылары, чуолаан саҥа сылтан үүккэ уонна ыанньык төбөтүгэр көрүллэр субсидиялары  көрөр “Саха Өрөспүүбүлүкэтигэр тыа хаһаайыстыбатын сайыннарыы туһунан” үптээх-харчылаах сокуон барылын тула икки сылы быһа өрөспүүбүлүкэ, улуустар, хаһаайыстыбалар салайааччыларын, үлэлии сылдьар дьону кытта ырытыһыы, кэпсэтии, дьүүллэһии барбыта. Үүт харчыта -- тыа сирин олохтоохторун саамай долгутар уонна күүскэ туруорсар боппуруостара.

Элбэх дьону бу ыанньык сүөһү  аайы бэриллэр  35 тыһ. солкуобайы төлүүр бэрээдэк барылын усулуобуйатыгар сир иэниттэн эмиэ тутулуктааҕа долгуппута.  Итинник барбыта буоллар, үгүс киһи төбө харчытын кыайан ылыа суох этэ. Тоҕо диэтэххэ, тустаах сокуоннарга олоҕуран, ити субсидияны 2,5 гектар эрэ сирдээх  кэтэх хаһаайыстыбалаах дьон ылыахтарын сөбө.

Бу боппуруоһу аан маҥнай аммалар көтөхпүттэрин атын улуустар олохтоохторо, Ил Түмэн дьокутааттара өйөөбүттэрэ. Хаһаайыстыба бас билэр сирин иэнэ ыанньык сүөһү төбөтүгэр көрүллэр үп бэрээдэгин усулуобуйатыгар сабыдыаллаабат буолбутун б.дь. ахсынньы ый 11 күнүгэр Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкинныын Амма улууһугар тахсан, нэһилиэктэр баһылыктарын, тыа хаһаайыстыбатын исписэлиистэрин, ТХПК салайааччыларын кытта кэпсэтэр, дьүүллэһэр кэммитигэр тыа хаһаайыстабатын миниистирин солбуйааччы Василий Афанасьев бигэргэппитэ.