Сокуоҥҥа уларытыы уопсай бултуур сиргэ, ол эбэтэр муниципальнай тэриллии эбэтэр куорат уокуругун сиригэр биирдиилээн дьоҥҥо бултуурга көҥүл биэрии туһунан буолар. Сокуоҥҥа киллэриллэр көннөрүүнэн, судаарыстыбаннай былаас тустаах боломуочуйалаах уорганынан көҥүл бэриллиэхтээх.
Ол курдук, сокуон барылыгар этиллэринэн, бултуур сиргэ көҥүл квотаҕа олоҕуран бэриллэр уонна булт лимиитэ бигэргэммэтэх сиригэр нуорманан салайтарыллыахтаах.
Кэмитиэт бэрэссэдээтэлэ Владимир Прокопьев эппитинэн, лимиит олохтоммут булдугар көҥүл 30%, кыыл табаттан уонна киистэн ураты, уочарата суох бэрээдэгинэн бэриллэр. Лимииттэммит бултка көҥүл 35%, кыыл табаттан уонна киистэн ураты, муниципальнай тэриллии анал хамыыһыйатын быһаарыытынан бэриллэр буолуоҕа. Хаалбыт 35% квотаны дьонтон сайаапка киирбит уочаратынан бэриллиэҕэ. Сайаапка олохтоммут квотаттан элбэх буоллаҕына, көҥүл сэрэбиэйдэһиинэн бэриллэр.
Санатар буоллахха, лимииттэммэтэх булка сайаапканы биирдиилээн дьон бултааһыҥҥа көҥүл болдьоҕо аһыллыан 30 күнүн инниттэн биэриэн наада. Оттон лимииттэммит булду бултуурга сайаапканы атырдьах ыйын 1 күнүттэн саҕалаан биэрэллэрэ ирдэнэр. Муус устар 1 күнүттэн бэс ыйын 3 күнүгэр диэри судаарыстыбаннай уонна муниципальнай өҥөлөр порталларыгар көҥүл ылааччылар испииһэктэрэ оҥоһуллар. Биирдиилээн дьон бу испииһэккэ киирэллэрин туһугар порталга киирэн тус кабинет нөҥүө сайаапка биэрэллэрэ ирдэнэр.
Мунньахха маны таһынан кэмитиэт чилиэннэрэ “Үөр сылгыны иитии” сокуон ыстатыйатыгар уларытыы киллэрии туһунан сокуон барылын өйөөтүлэр.