Норуот дьокутаата улуус салалтатын, департаменнарын уонна тэрилтэ салайааччыларын, уопсастыбынньыктары кытта анаан-минээн көрсөн мунньахтаата. Кинилэр күннээҕи үлэлэрин-хамнастарын кытта билистэ уонна өрөспүүбүлүкэтээҕи сокуоннары тупсарыыга этиилэри иһиттэ.  

Улуустааҕы Үөрэх салаатын салайааччыта Алевтина Аргунова «Саха Өрөспүүбүлүкэтигэр үөрэх туһунан» сокуоҥҥа кэккэ уларыйыылары киллэрэр туһунан санаатын үллэһиннэ. Чопчу оҕону иитии-үөрэтии уопсай үөрэхтээһин ситимигэр туспа булгуччулаах таһым быһыытынан ылыллан, биир кэлим торум (кэнсиэпсийэ) оҥоһуллуохтааҕын туһаайда. Онуоха федеральнай үөрэх стандартыгар олоҕурар тоҕоостооҕун ыйда.

Мунньах кэнниттэн Антонина Григорьева Антоновкаҕа тутулла тутар 175 олордор миэстэлээх А.Я. Овчинникова аатынан «Түһүлгэ» норуот айымньытын дьиэтигэр сылдьан үлэ хаамыытын кытта билистэ. Бэдэрээтчит – «Стройимпульс» ХЭУо. Экспертизата суох тутуу суумата – 120 мөл. солк. Билиҥҥи туругунан, акылаат үлэтэ 90%-на бүппүт, бастакы этээс эркинэн уонна колонналарын оҥоруу үлэтэ барар. 2021 сыл ахсынньы ыйыгар эбийиэги үлэҕэ киллэрэргэ былаанныыллар. Антонина Афанасьевна Чаппанда оскуолатын уонна «Түһүлгэ» норуот айымньытын дьиэтин тутуутугар үлэ хаачыстыбалаахтык ыытылларын бэлиэтээтэ. Кини тутааччыларга саҕалаабыт үлэлэрин этиллибит болдьоххо диэри тиһэҕэр тиэрдэллэригэр баҕа санаатын эттэ.

Маны таһынан, Антонина Григорьева 1-кы уонна 2-с №-дээх Ньурбатааҕы орто оскуола боруогун аан маҥнай атыллаабыт кырачааннары, учууталлары уонна төрөппүттэри саҥа үөрэх дьылынан эҕэрдэлээтэ. 

Ол кэннэ Ньурба куоратын «Вертолетка» микро-оройуонугар инникитин тутуллуохтаах ыраас уунан хааччыйар скважина миэстэтин тиийэн көрдө. Ууну ыраастыыр ыстаансыйа кыамтата – сууккаҕа 1200 кубометр. Билиҥҥитэ сир аннынааҕы уу химическэй састаабын, саппааһын быһаарар чинчийэр үлэлэр ыытыллаллар («Гидросфера» ХЭУо). Барыллаан бырайыактааһын СӨ Үп министиэристибэтигэр сөбүлэҥи ааспыта, билигин ОДьКХ министиэристибэтигэр көрүллэр. Бырайыак иннинээҕи үлэни «Якутагропромпроект» ААУо толорбут. Бу ыйга ууну ыраастыыр скважинаны бырайыактааһыҥҥа 2021 сыл бэс ыйыгар диэри болдьохтоох куонкурус биллэриллиэҕэ, ол кэннэ ОДьКХ министиэристибэтигэр сайаапка быһыытынан киирэн, 2020-2023 сс. «Ыраас уу» федеральнай бырагыраамаҕа кыттарга бэлэмнэнэллэр. Салгыы Антонина Григорьева «Демография» национальнай бырайыак чэрчитинэн тутулла турар 280 миэстэлээх уһуйаан үлэтин-хамнаһын кытта билистэ. Бу сыл бүтүүтэ эбийиэк үлэҕэ киирэрэ былааннанар.

Ил Түмэн пресс-сулууспата