СӨ экэниэмикэҕэ миниистирэ Майя Данилова тырааныспар нолуогун ыстаапкатын үрдэтии туһунан иһитиннэрии оҥордо. Бу боппуруос нэһилиэнньэни лаппа интэриэһиргэтэр. Ол курдук, кимнээххэ үрдүөҕэй диэн. Санатар буоллахха, тырааныспар нолуогун ыстаапката 2010 сыллаахха быһыллыбыта уонна ити кэмтэн индексация оҥоһулла илик. Тустаах сокуон бырайыагар ыйылларынан, дьоҕус массыыналар (малолитражкалар) хабыллыбаттар, ол оннугар 200-тэн үөһэ ат күүстээхтэр нолуоктарын икки төгүл үрдэтэргэ диэн этиллэр. Ол курдук, 200-250 ат күүстээхтэргэ биир атын күүһүгэр, 60 солк., онтон 250-тан үөһэ ат күүстээхтэргэ биир атын күүһүгэр 120 солк. быспыттар. Бу олоххо киирдэҕинэ, суол пуондатыгар сыл устата нолуок быһыытынан 190 мөл. киириэхтээх уонна ити үбүнэн 9,5 км уһуннаах суол өрөмүөннэниллиэн эбэтэр 3,8 км уһуннаах гравий суол оҥоһуллуон сөп. Санатар буоллахха, ити нолуоктан аартыка улуустарын олохтоохторо уонна инбэлииттэр босхолоноллор. Миниистир Мая Андреевна быһаарбытынан үрдэтиллибит тырааныспар нолуогун төлөөһүн 2022 сыл бүтүүтэ саҕаланыаҕа, онуоха диэри пандемия тохтуохтаах.
Дьокутааттар пандемин кэмигэр тырааныспар нолуогун үрдэтэри утаралларын биллэрдилэр. Норуот дьокутаата Виктор Федоров өрөспүүбүлүкэ үрдүнэн 200-тэн тахса ат күүстээх тимир көлө ахсаана 67 %-ҥа тэҥнэһэр уонна үксүлэрэ 10 сыл «саастаахтар”. Кини этэринэн, тустаах нолуок үрдээһинэ халыҥ хармааннаах эрэ дьоҥҥо тарҕаммат. Дьокутаат Ньургуйаана Захарова эргэ джиптэри нэһилиэнньэ суол-иис мөлтөҕүттэн сылтаан миинэрин этэн туран, нолуогу үрдэтиини тохтото түһэргэ этии киллэрдэ. Норуот дьокутааттара Павел Ксенофонтов уонна Алексей Еремеев массыыналар оҥоһуллубут сылларыгар тохтоон сөптөөх быһаарыныыны ыларга (дифференцированнай сыһыан) этэн туран, бу боппуруоһу эһиил көрөргө этии киллэрдилэр.
Куоластааһын түмүгүнэн, тустаах кэмитиэт чилиэннэрэ көннөрүүнү ылымматылар. Кэмитиэт дьаһалыгар 2021 сыл бастакы кыбаарталыгар 200-тэн тахса ат күүстээх массыыналар оҥоһуллубут сылларын учуоттаан туран дифференцированнай ньыманы туһанан сөптөөх быһаарыыны ылары эттилэр.
Салгыы эмиэ итиннэ сыһыаннаах боппуруостар көрүлүннүлэр. Үөһэ этэн аһарбыппыт курдук, сэттэ көннөрүү киирбититтэн кэмитиэт иккитин эрэ ылынна. Онон сарсын, сэтинньи 10 күнүгэр, буолуохтаах уочарата суох ХХI пленарнай сиэссийэҕэ нолуок бэлиитикэтин сокуонугар ити көннөрүүлэри быһаарсыахтара. Ол курдук, биирдиилээн урбаанньыттар уонна нэһилиэнньэ гаас уматыгы массыыналарыгар туһаналларыгар туох чэпчэтии баар буоларын уонна норуот дьокутааттара Алена Атласова, Евгений Перфильев уонна Юрий Николаев элбэх оҕолоох дьиэ кэргэн төрөппүттэрэ хас ат күүстээх массыыналаахтарыттан тутулуктаммакка, нолуоктан босхолоноллорун тустарынан көннөрүүлэри сарсын буолуохтаах сиэссийэҕэ быыһарсыахтара.
- 0
- 0
- 0
- 0
- 0
- 0