Бастаан утаа Ил Дархан Айсен Николаев Кирилл Бычковы докутааттарга билиһиннэрэригэр, кини биографиятыгар улаханнык тохтообото,  эрдэ билиһиннэрбитэ.   Санатан эттэххэ, Кирилл Евгеньевич Ил Дархан Айсен Николаев быйыл муус устар 30 күнүнээҕи 1158 №-дээх Ыйааҕынан СӨ Бырабыыталыстыбатын бэрэссэдээтэлин бастакы солбуйааччытын эбээһинэһин толорооччунан анаммыта. Ил Дархан  Кирилл Бычков 2018 сыллаахтан бэрэссэдээтэли солбуйааччынан үлэлээбитин туһунан этэн  туран, бу дуоһунаска  инновация,  сыыппараны, тутуу комплексын сайыннарыы, Өлүөнэ күргэтин о.да. а. тутаах  боппуруостарынан күүскэ дьарыктаммытын иһитиннэрдэ. Кирилл Бычков инники өттүгэр үлэлиэхтээх былаанын  кылгастык кэпсээтэ. Салгыы норуот дьокутааттара ыйытыылары биэрдилэр. Бастакынан норуот дьокутаата  Евгений Кожуков тыл ылан,   тутууга албыннаппыт дьон боппуруостарыгар туох үлэни ыытар былааннааҕын ыйыппытыгар, Кирилл Бычков  билиҥҥи кэмҥэ сытыытык турар боппуруос көтөҕүллүбүтүн туһунан этэн туран,  бу өттүгэр сөптөөх үлэ ыытыллыбытын уонна инники өттүгэр болҕомто киинигэр сылдьыаҕа диэн бэлиэтээтэ. Норуот дьокутаата Алена Атласова   өрөспүүбүлүкэ үрдүнэн 24 тыһ. тахса элбэх оҕолоох ыалтан 10 тыһ. кэриҥэтэ учаастагынан хааччыллыбытын  санатан туран, бу учаастактары инженернэй ситиминэн хааччыйыыга сөптөөх болҕомто ууруллан үлэ күүскэ  хаһан саҕаланыан сөбүн туһунан токкоолосто. Кирилл Бычков манна эмиэ сөптөөх болҕомто ууруллан үлэ барыа диэн диэн хоруйдаата.  Дьокутаат Евгений Перфильев хаарбах дьиэттэн дьону  көһөрүү бырагырааматыгар федеральнай уонна  эрэгийиэннээҕи бүддьүөттэн  үп көрүллэн,  итиннэ үлэ күүскэ барарын ыйда уонна   дьон көһөн тахсыбыт эргэ дьиэлэрин  көтөрүүгэ  санаатын эттэ. Иччитэх турар эргэ дьиэлэри көтүрүүгэ болҕомто ууруллуохтааҕын санатта, холобур, үгүс эргэ дьиэ  «пааматыннык» буолан өр тураллара бэрдэ суоҕа чуолкай, аны ол туран,  умайыахтарын даҕаны сөп, умайаллар даҕаны. Муниципальнай тэриллиилэргэ ити боппуруоһу быһааралларыгар үгүстэригэр сөптөөх үптэрэ  суох. Кирилл Бычков: «Олус сөптөөх ыйытыыны биэрдиҥ. Өрөспүүбүлүкэ үрдүнэн хаарбах дьиэттэн  дьону көһөрүү бырагыраамата олоххо киириитин көрдөрүүтэ куһаҕана суох, үлэ барар. Эргэ дьиэлэри көтөрүүгэ эмиэ болҕомто ууруллар, ааспыт сылларга элбэх дьиэни көтүрдүбүт. Инники өттүгэр улуустары кытта ити боппуруоска үлэлиэхпит», -- диэн хоруйдаата. Салгыы өрөспүүбүлүкэ тутуутун комплексыгар өр сылларга үлэлээбит тутааччы,  дьокутаат Алиш Мамедов  өрөспүүбүлүкэ тутуутун билиҥҥи балаһыанньатыгар санаатын аһаҕастык эттэ. «Кэлиҥҥи кэмҥэ  өрөспүүбүлүкэ тутуутугар олохтоох тутааччылар кыттыылара лаппа аҕыйаан иһэр. Урукку курдук улахан, бөдөҥ хампаанньалар суохтарын кэриэтэ, барыларын "бытарытыы" барда. Улахан тутуулары үксүн тастан кэлээччилэр ылар буолбуттара кистэл буолбатах. Онон  манна инники өттүгэр болҕомто ууруллуон наада», -- диэн эттэ.  Кирилл Евгеньевич   өрөспүүбүлүкэҕэ социальнай тутууга олохтоох хампаанньалар үксүн үлэлииллэрин  быһаарда уонна кэлиҥҥи  кэмҥэ Саха сирин авиапортарын  саҥардан оҥорууга  тастанкэлбит хампаанньалар үлэлииллэрэ баарын эттэ. Ол гынан баран, Чульман авиапордун саҥардыыга олохтоох тэрилтэ ылсан, бу хайысхаҕа лаппа уопутуруохтааҕын туһунан иһитиннэрдэ. Онон   инники өттүгэр тутууга олохтоох тэрилтэлэр үлэлииллэригэр болҕомто ууруллуоҕа диэн эрэннэрдэ.

Дьокутааттар дьүүллэспиттэрин кэнниттэн Кирилл Бычков кандидатуратын  кистэлэҥ куоластааһыҥҥа киллэрдилэр.  Бүтэһиктээх түмүк куоластары ааҕыы кэнниттэн биллиэҕэ.

Ыспыраапка:

Кирилл Евгеньевич Москва уобалаһын Бырабыыталыстыбатын бэрэссэдээтэлин солбуйааччынан, “Black Swan Capital Partners Limited” хампаанньа управляющайынан, «Стройтрансгаз» ААУо дириэктэрин солбуйааччынан, Тверь уобалаһын губернаторын солбуйааччынан, эрэгийиэн сайдыытын департаменын салайааччытынан, Украинаҕа экэниэмикэ сайдыытын миниистирин сүбэһитинэн үлэлии сылдьыбыт. Бэйэтэ 1974 с. Москваҕа төрөөбүт. Москватааҕы норуоттар икки ардыларынааҕы сыһыан судаарыстыбаннай институтун үөрэнэн бүтэрбит. Үөрэҕин бүтэрэн баран, “НК “Сиданко” ААУо, “Cargill International”, “Гео-Альянс” курдук хампаанньаларга үлэлээбит. Кирилл Бычков Саха сиригэр туох сыһыаннааҕый диир буоллахха, кини 2014 с. Дьокуускайга кытаанах бөҕү хомуйар, иккиһин оҥорон таһаарар технопаарка тутар санаалаах кэлэ сылдьыбыта. РФ Бэрэсидьиэнигэр бастайааннай бэрэстэбиитэлистибэни, Дьокуускай куорат мэрын Айсен Николаевы кытары дуогабар түһэрсибитэ.