Олоҕун суолун сырдатар, өрөспүүбүлүкэ, дойду туһугар үлэтин кэпсиир дакылааты СӨ Бырабыыталыстыбатын Бэрэссэдээтэлин солбуйааччы Ольга Балабкина оҥордо. Виталий Николаевич Госдума III, IV ыҥырыылаах мунньаҕар дьокутаат буолан талыллан үлэлиир кэмигэр сокуон 70 бырайыагын оҥорсубутун уонна суруйбутун, итинтэн 10 сокуона Госдуманан ылыллан, билиҥҥэ диэри үлэлии турарын Ольга Валерьевна тоһоҕолоон бэлиэтээтэ.

--Кини сэрии бүтээтин кытта, 1946 сыллаахха төрөөбүт буолан, кыайыылаах норуот патриоттуу тыыныгар иитиллибитэ. Ол иһин олоҕун тухары төрөөбүт дойдутугар бэриниилээхтик сулууспалаата. Госдумаҕа дьокутааттыыр кэмигэр, күүскэ туруорсан, хотугу биэнсийэни, хамнаска эбиини хааллартарбыта, хоту таһаҕас тиэйиитин, айан-сырыы, сир баайын хостооһун, ювелирнай дьыала, социальнай-экэнэмиичэскэй боппуруостары сокуонунан бигэргэппитэ. Ил Түмэн IV ыҥырыытыгар Бэрэссэдээтэллииригэр үлэни Госдума ньыматынан тэрийбитэ. Ол саҥа сүүрээн этэ. Аһаҕас парламены кини олохтообута, мунньаҕы аан бастаан быһа эпииргэ ыыттаран. Кини наар олох уларыйар, оннун булар уустук кэмнэригэр салайар үлэҕэ сылдьыбыта уонна ол эбээһинэһин чиэстээхтик толорбута.

Ил Түмэн, Госдума дьокутаатынан, Мииринэй баһылыгынан таһаарыылаахтык үлэлээбит, “Хотугу Сулус” уордьан кавалера, СӨ норуотун хаһаайыстыбатын үтүөлээх үлэһитэ, Мииринэй оройуонун Бочуоттаах гражданина Виталий Николаевич Басыгысов өрөспүүбүлүкэ социальнай-экэнэмиичэскэй сайдыытыгар, парламентаризм туруутугар, бырамыысыланнаска, бэлиитикэҕэ киллэрбит кылаатын иһин Ил Дархан Махтал суругунан наҕараадаланна.

Кинини бу күн Ил Түмэн Бэрэссэдээтэлэ Петр Гоголев, Госдума дьокутаата Галина Данчикова, Госдума V ыҥырыытын дьокутаата Юлия Песковская,  СӨ Конституционнай суутун Бэрэссэдээтэлэ Александр Ким-Кимэн, РФ сенатора Александр Акимов, Тыва Үрдүкү Хуралын Бэрэссэдээтэлэ Кан-оол Тимурович Даваа уо.д.а. бииргэ алтыһан үлэлээбит дьоно эҕэрдэлээтилэр.  

Ыспыраапка

Виталий Николаевич Басыгысов 1946 сыл кулун тутар 1 күнүгэр Мииринэй оройуонун Таас Үрэх сэлиэнньэтигэр холкуостаах дьиэ кэргэнигэр төрөөбүтэ. 1966-1970 сс. Свердловтааҕы горнай институкка үөрэнэн,  хайа инженерин идэтин баһылаабыта уонна Мииринэйгэ 30 сыл хайаны байытар кэмбинээккэ үлэлээбитэ,  оробуочайтан саҕалаан сыах начаалынньыгар тиийэ үүммүтэ. 1983 сыллаахха «Якуталмаз» тэрилтэлэр холбоһуктарын баартыйаларын кэмитиэтин сэкирэтээринэн талыллыбыта. 1993 сыллаахха СӨ Бэрэсидьиэнин Ыйааҕынан Мииринэй оройуонун баһылыгынан анаммыта.1995 сыллаахха быыбарга кыайан, баһылыгынан үлэлээбитэ. Кини баһылыктыыр кэмигэр оройуон бырамыысыланнаһын салаата сайдыбыта, олорор дьиэлэр, социальнай эбийиэктэр тутуллубуттара. 1999 сыллаахха Мииринэй куорат бочуоттаах гражданина буолбута.

1999 сыл ахсынньы 9 күнүгэр РФ Госдуматын дьокутаатынан талыллыбыта, «Норуот баартыйата» эрэгийиэннээҕи салаатын бэрэссэдээтэлинэн буолбута.

2003 сыллаахха Госдума дьокутаатынан иккистээн талыллыбыта. 2008 сыллааҕы быыбар түмүгүнэн Ил Түмэн дьокутаата буолбута уонна ити сыл кулун тутар 20 күнүгэр СӨ Судаарыстыбаннай Мунньаҕын (Ил Түмэн) Бэрэссэдээтэлинэн талыллыбыта.  

https://www.youtube.com/c/ИлТумэнонлайн