Миниистир 2018-2020 сылларга өрөспүүбүлүкэ баайын-дуолун кэтэх бас билиигэ биэрии барыллаан бырагыраамата үлэлээбитин иһитиннэрдэ. Былырыын приватизация 2 көрүҥэ оҥоһуллубут. Ол эбэтэр судаарыстыбаннай унитарнай тэрилтэлэри аахсыйалаах уопсастыбаларга уларыппыттар. Судаарыстыбаннай баайы-дуолу аахсыйалаах уопсастыбалар уставной хапытаалларыгар кылаат быһыытынан киллэрбиттэр.

Холобур курдук эттэххэ, былырыын ахсынньы 29 күнүгэр өрөспүүбүлүкэтээҕи “Тэлэбиидэнньэ уонна араадьыйа тэхиньиичэскэй киинин” аахсыйалаах уопсастыбаҕа уларытар туһунан СӨ Бырабыыталыстыбатын дьаһала тахсыбыт. Онуоха саҥа тэрилтэ аахсыйатын 100 % судаарыстыба бас билиитигэр хаалбыт.

Бу курдук Павел Владимирович өрөспүүбүлүкэ хас да тэрилтэтин приватизациятын туһунан сиһилии сырдатта. Саха сиригэр 2020 сылга ханнык тэрилтэлэр уларыйбыттарын Арассыыйа Федерациятын, СӨ сир сыһыаннаһыыларын уонна баайга-дуолга министиэристибэтин официальнай саайтарыгар булан көрүөххэ сөп.

Салгыы, туспа боппуруоһунан, миниистир 2021-2023 сылларга ханнык судаарыстыба баайа-дуола кэтэх бас билиигэ көһөрүн кэпсээтэ. Ол курдук, тэрилтэлэртэн “Якутия” авиахампаанньа аахсыйалара кэтэх бас билиигэ бараллара былааннаммыт. Маны таһынан өрөспүүбүлүкэ уотун лииньийэтин тутуулара, араас эбийиэктэр, сир учаастактара приватизация испииһэгэр киирбиттэр.

Мунньах кэмигэр Павел Ксенофонтов бас билээччитэ суох гаас ситимнэрин улуустарга биэрии үлэ хаамыытыгар сыһыаннаах боппуруоһу биэрдэ.

Феодосия Габышева бас билээччитэ суох эбийиэктэри улуустар бас билиилэригэр биэриигэ министиэристибэ тугунан көмөлөһөрүй диэн ыйытта.

Петр Аммосов кэтэх бас билиигэ бэриллиэхтээх ордубут судаарыстыбаннай баай-дуол уопсай сыанатын чуолкайдаста.

Виктор Федоров Өрөспүүбүлүкэтээҕи инвестиционнай хампаанньа үлэтин инники былааннарын сэҥээрдэ.

Виктор Губарев кэлиҥҥи коррупционнай айдааннарынан Дьокуускай аэропордун үлэтин күүскэ хонтуруоллуурга этии киллэрдэ.

Маны таһынан Иннокентий Романов, Иван Данилов боппуруостары биэрдилэр.

Петр Гоголев Чөркөөх оҕо санаторийын дьиэтин олохтоох мусуойга биэриигэ көмөлөһөллөрүгэр көрдөстө.

Мунньах түмүгүнэн норуот дьокутааттара уурааҕы ылыннылар.