Өрөгөйдөөх линейкаҕа Госдума дьокутаата Галина Данчикова, Нам улууһун баһылыга Юрий Слепцов кыттыыны ыллылар.

 Спикер үөрэммит оскуолатын кэлэктиибин, үөрэнээччилэрин бэлиэ күнүнэн эҕэрдэлээтэ, манна уһуйуллубут үтүө сылларын сылаастык аҕынна.

 “Оҕолоор, кыһаллан, дьаныһан үөрэниҥ, чиҥ билииилээх эрэ киһи элбэҕи ситиһэр. Бастыҥнары кытта күрэстэһэр кыахтаах дьон буолуҥ!” – диэн баҕа санаатын кэнчээри ыччакка туһаайан тиэртэ.  

 Быйыл үөрэх бу кыһата 150 сааһын бэлиэтиир. Алексей Ильич оскуола учууталларын наҕараадалаата. "СӨ үөрэҕин тиһигин туйгуна” бэлиэни алын кылаас учуутала Посельская Туйаара Николаевна уонна история учуутала Кривошапкина Ольга Гэрэловна туттулар

Галина Данчикова эҕэрдэ тылын этэригэр: “Бу үөрэх дьылыгар Арассыыйа үөрэнээччитин ахсаана -- 17 мөл. Бүгүн өрөспүүбүлүкэбитигэр 640 оскуола 148 тыһыынча оҕону эҕэрдэлии көрүстэ. Итинтэн 16 тыһыынчата – маҥнайгы кылаастар”, -- диэтэ. Оҕолор уонна үөрэхтээһин судаарыстыба бэлиитикэтин сүрүн тосхоло буолалларын бэлиэтээтэ. Кини үөрүүлээх түгэнинэн алын сүһүөх оскуола учууутала  Рожина Марианна Дмитриевнаҕа уонна нуучча тылын учуутала Рыкунова Майя Николаевнаҕа “РФ иитии уонна үөрэҕирии эйгэлэрин Бочуоттаах үлэһитэ” бэлиэлэри туттарда.

Улуус баһылыга Юрий Слепцов быйылгы үөрэх дьылын улуу биир дойдулаахтара Максим Кирович Аммосов төрөөбүтэ 125 уонна Саха АССР тэриллибитэ 100 сылларыгар туһулаан тэрийэллэригэр хайысхалаата.

Оробуочай дэлэгээссийэ кырдьаҕастар уонна инбэлииттэр дьиэлэрэ тутуллуохтаах сирин, Аппааныга тутулла турар Култуура киинин көрдүлэр, Граф Биэрэгэр баар Намнааҕы техникумҥа сырыттылар.

Аппааны култуурунай киинэ сүрүн үлэтэ түмүктэммит, бу сыл бүтүүтэ үлэҕэ киириэхтээх. Нэһилиэк баһылыга Иван Ноговицын өр күүппүт кулууптара тутуллан бүтэн эрэриттэн олохтоохтор бары үөрэллэрин  уонна махтаналларын биллэрдэ.

Граф Биэрэгэр баар Намнааҕы техникум дириэктэрэ Ньургустаан Жирков үөрэх кыһатын ситиһиитин билиһиннэрдэ. Бүтэрээччилэр бары үлэ булаллар, сорохтор үрдэтинэллэр эбит. Алексей Ильич бырамыысыланнай хампаанньалары кытта дуогабардаһан, выпускниктары онно үлэлэтэр туһунан сүбэлээтэ. Техникум матырыйаалынай-тиэхиньиичэскэй базата саҥардыллыбыт, ол гынан баран, интэринээттээх саҥа  куорпус тутуллара уолдьаспыт. Былааҥҥа 2025 сылга турар эбит.