Петр Гоголев тыл этэригэр бастатан парламент уонна борокуратуура 2019 сылга илии баттаспыт сөбүлэһиилэригэр тохтоото. Бу сөбүлэһии саҥалыы эрэдээксийэтигэр нэһилиэнньэни быраап өттүнэн сырдатыы, буруйу оҥорууну сэрэтии эйгэлэрэ биллэрдик кэҥэтиллэн бэриллибиттэрэ, докумуоннары уларытыы бэрээдэгэ уонна болдьохторо тупсарыллыбыттара, электроннай докумуон эргиирэ киллэриллибитэ бэлиэтэннэ.
«Кыттыгас үлэлээһин, парламент структураларын уонна борокуратуура уорганнарын ыллыктаах хардарыта дьайсылаах бииргэ үлэлээһиннэрин быраактыката олохтоммута», -- диэн эттэ Ил Түмэн Бэрэссэдээтэлэ. Кини бэлиэтээбитинэн, сокуоннар барылларын кытары үлэҕэ борокуратуура адьас эрдэтээҕи кэрдиис кэмтэн кыттыһар. Итинник сыһыан саҥа ылыллар өрөспүүбүлүкэтээҕи сокуоннарга борокуратуура өттүттэн сууттаһыы уонна бырачыастааһын ахсаана биллэрдик намтааһыныгар тиэрдэр. Ол курдук, 2019 сылы кытта тэҥнээтэххэ, 2020 сылга борокуратуура утарар хардатын аакталарын ахсаана икки төгүл кыччаата (13-тэн 6-ҕа диэри).
Петр Гоголев салгыы 2020 сылга, хааччахтааһыннаах дьаһаллар кытааппыт усулуобуйаларыгар, парламент ыыппыт үлэтин туһунан кэпсээтэ. Борокуратуура, кини бэрэстэбиитэллэрэ үлэ ВКС ньыматынан көрүҥэр ньымсатык көһө охсон биэрэннэр бары дьаһалларга көхтөөхтүк кыттыбыттарын бэлиэтээн аһарда. Ааспыт сылга өрөспүүбүлүкэ борокуратуурата 181 сокуон барылын көрбүт. Борокуратуура федеральнай сокуоннар миэстэтигэр тутуһуллууларын суһаллык кэтээн көрүөхтээх эбээһинэһин чэрчитинэн, өрөспүүбүлүкэ сокуоннарын аакталара федеральнай сокуоннарга эбэтэр олор уларыйыыларыгар сөп түбэһиннэрэн ылыллаллара булгуччулааҕын бэлиэтээн 49 этиини киллэрбит.
Өрөспүүбүлүкэ борокуруорун бырачыаһынан уонна СӨ Үрдүкү суутун быһаарыытынан, «Өрөспүүбүлүкэ нэһилиэнньэтин уонна сирин-уотун айылҕа уонна киһи дьайыларыттан тахсар ыксаллаах быһыыттан-майгыттан көмүскээһин туһунан», «Саха Өрөспүүбүлүкэтигэр олохтоох референдум туһунан» сокуоннарга уларытыылар киллэриллибиттэр. 2020 сылга Административнай сокуону кэһиилэр кодексаларын, нэһилиэнньэ доруобуйатын уонна сынньалаҥын харыстыбылын, оҕолору чэбдигирдиини кытта сибээстээх өрөспүүбүлүкэ сокуоннарын биирдиилээн нуормаларыгар өрөспүүбүлүкэ борокуруорун бырачыаһын туһунан Ил Түмэн 4 уурааҕы ылыммыт.
Петр Гоголев салгыы бэлиэтээн эппитинэн, дьокутаат куорпуһа уонна борокуратуура бүддьүөт таҥыллыытын чэрчитинэн, кыттыгас үлэни ыыттылар. «Толоруулаах уонна сокуону таһаарар былаастар кыттыгас үлэлэрин түмүгүнэн, 2021 сылга уонна 2022-2023 сс. былааннаах кэмҥэ үчүгэйдик чопчуланан таҥыллыбыт судаарыстыбаннай бүддьүөт ылыллара ситиһилиннэ. Борокуратуура бүддьүөт сокуонун барылын кытта хара бастакыттан ыкса үлэлэспитэ. Ол курдук, тулаайах оҕолору олорор дьиэнэн хааччыйыыга, элбэх оҕолоох дьиэ кэргэттэргэ көрүллүбүт сир учаастактара сөптөөх инфраструктуралаах буолууларыгар, элбэх кыбартыыралаах дьиэлэр олохтоохторун уопсай бас билиилэрин хапытаалынай өрөмүөннэригэр, саахалланар туруктаах дьиэлэртэн кырасдааннары көһөрүүгэ, о.д.а. сытыы боппуруостарга бүддьүөт үбүлээһинигэр ордук күүскэ болҕомтотун ууран үлэлээтэ», -- диэтэ парламент салайааччыта.
«Бүддьүөт таҥыллыытыгар ыараханы үөскэппит үгүс боппуруостарга үбүлээһин төрүттэрин көрдөөһүҥҥэ уонна булууга бырабыыталыстыба күүстээх хамсаныылары оҥорбутун бэлиэтиир наадалаах. Аҥаардас соҕотох холобур: хомунаалынай комплекс тэрилтэлэрин түһэн хаалар дохуоттара субсидияланыыларын үбүлээһиҥҥэ, бүддьүөтү чуолкайдааһын чэрчитинэн 5,3 млрд. солк. харчы эбии көрүллүбүтэ», - диэн кэпсээтэ.
Петр Гоголев эппитинэн, 2021 сылга РФ Төрүт сокуонугар көннөрүүлэри киллэриини толорууга ылыы быһыытынан, өрөспүүбүлүкэ сокуоннарын федеральнай сокуоннарга сөп түбэһиннэриигэ күүстээх үлэ ыытыллыахтаах. Парламент бэйэтин кэтээн, үөрэтэн көрүүтүгэр олоҕуран, уларытыылары киллэриини эрэйэр СӨ Сирин кодексын уонна 21 сокуонун барыллаан испииһэгэ оҥоһуллубут. Петр Гоголев салгыы эппитинэн, норуот дьокутааттара СӨ Төрүт сокуонун кэккэ ыстатыйаларыгар уларытыылары киллэриэхтэрэ.
Ил Түмэн Бэрэссэдээтэлэ этиитин түмүгэр 2021 сылга парламент сокуону кытта үлэҕэ былааннарын кытта билиһиннэрдэ. Борокуратуура үлэһиттэригэр туйгун доруобуйаны, үлэлэригэр ситиһиилэри баҕарда.
Ил Түмэн пресс-сулууспата.
- 0
- 0
- 0
- 0
- 0
- 0