Бастакы уочарат, улуус баһылыктарын иннигэр биирдиилэн дьоҥҥо дьиэҕэ олоруу эрэсиимин тутуһалларын уонна өрөспүүбүлүкэҕэ атын регионнартан, тас дойдулартан киирэр дьоҥҥо хонтуруол күүһүрүөхтээҕин ыйда. Иккиһинэн, обсерватор үлэтин тэрийии туһунан таарыйда. Элбэх  киһи ыалдьыан сөптөөх муниципальнай тэриллиилэргэ эбии обсерватордары тэрийии үлэлэрэ ыытыллыахтаах. Маны таһынан, Айсен Николаев,  өрөспүүбүлүкэ куораттарыгар уонна оройуоннарыгар пасха бырааһынньыгынан таҥараҕа сулууспа тэрээһиннэрин ыытыы боппуруостарыгар болҕомто уурда. "Бу өрөбүллэргэ Пасха бырааһынньыга бэлиэтэниэҕэ. Өрөспүүбүлүкэ үрдүнэн кылаабынай санитарнай быраас этиитинэн уонна Дьокуускайдааҕы Епархия сөбүлэҥинэн тосту быһаарыы ылыныллыбыта - Алдан куоракка уонна Алдан оройуонун Ленинскай бөһүөлэгэр, харантыын эрэсиимэ киирбитинэн, пасха бырааһынньыгын ыытыыта таҥара сулууспатын дьонунан эрэ ыытыллыаҕа. Атыттарга -  таҥараҕа сүгүрүйүү сулууспата өрөспүүбүлүкэ кылаабынай бырааһа тустаах ыйбыт миэрэлэринэн уонна дьиэҕэ олоруу эрэсиимэ тутуһуллан ыытыллыахтаах", - диэн Айсен Николаев бэлиэтээтэ. Туспа болҕомто муус устар 28 күнүнээҕи Төрөппүт күнүн  бэлиэтиир тэрээһиннэригэр ууруллуохтаах. Киһи уҥуоҕар дьон сырыытын аҕыйатар сыалтан дойду үрдүнэн кылабыыһаларга сылдьыы күөмчүлэнэрэ сүбэлэнэр. Мунньахха өрөспүүбүлүкэ Баһылыга муус устар 16 күнүттэн Чаайатааҕы гаас-ньиэп конденсатын хостонор сиригэр тустаах Ыйааҕынан харантыын биллэрбитин туһунан иһитиннэрдэ. Билиҥҥи туругунан, ХЭТ «Газпром добыча Ноябрьск»  вахтовай бөһүөлэгэр киирии-тахсыы бобуулаах, балаһыанньа хонтуруолга ылынылынна. Саха сирин вице-премьера, өрөспүүбүлүкэтээҕи коронавирус ыарыы тарҕаныытын утары суһал ыстаап бэрэссэдээтэлэ Ольга Балабкина дьиэҕэ олоруу эрэсиимин тутуһарга улуус баһылыктарын болҕомтоҕо ылалларыгар ыйда.  Аҕам саастаах дьон, инбэлиттэр олорор дьиэлэригэр, оҕо тэрилтэлэрин, оҕону чэбдигирдэр кииннэргэ, психоневрологическай диспансердарга үлэһиттэр доруобуйаларын кэтээн көрүүгэ болҕомто күүһүрүөхтээҕин бэлиэтээтэ. Маны таһынан, медицинскэй тэрилтэлэр ыраас-чэнчис буолалларын, элбэх кыбартыыралаах дьиэлэргэ дезинфекция ыытыллыахтааҕын чопчулаата. Салгыы нэһилиэнньэҕэ сэрэхтээх буолууну, таһынааҕы ыаллары кытта сыһыаны аҕыйатары, ону таһынан оҕолорго харыстыыр миэрэлэри ылынан тутуһалларыгар чопчулаата. Мунньах ыытыллар кэмигэр тустаах ыытыллар тэрээһиннэр тустарынан Алдан, Кэбээйи, Мэҥэ-Хаҥалас уонна Мииринэй оройуоннарын МТ баһылыктара дакылааттаатылар диэн СӨ Баһылыгын уонна Бырабыыталыстыбатын пресс-сулууспата иһитиннэрдэ.