— Аан дойдуга ыксаллаах быһыы-майгы туран, олохпут укулаатыгар улахан уларыйыылары киллэрдэ. Коронавирус ыарыы үөрэхтээһиҥҥэ эмиэ түргэн быһаарыыны ыларга күһэйдэ. Дистанционнай үөрэхтээһин эмискэччи киирэн, биллэн турар, учууталлар да, төрөппүттэр да үгүс күчүмэҕэйдэри көрсүбүттэрэ саарбахтаммат. Маннык үөрэхтээһин туох кыһалҕалар баалларын, туохха болҕомто ууруохтаахпытын дьэҥкэтик көрдөрдө. Ол курдук, сибээс, Интернет сир аайы үчүгэйдик үлэлиир, сыыдам буолбатах. Аны туран, сибээскэ ороскуот элбиир. Маны таһынан, үөрэнээччилэр технологиянан хааччыллыылара туспа боппуруос буолар. Элбэх оҕолоох, кыаммат араҥа ыаллар оҕолорун көмпүүтэринэн, үөрэх тээбириннэринэн хааччыйыы боппуруоһа эмиэ сытыытык турар. Саҥа технологиялары киллэрии, учууталлары үөрэттэрии өттүгэр үлэлэһэрбит күүтүллэр. Ол да буоллар, биһиги өрөспүүбүлүкэбитигэр дистанционнай үөрэхтээһин уопута баар. Киэҥ сиринэн тайаан сытар буоламмыт, итиэннэ суол-иис, сибээс өттүгэр айылҕабыт ураты усулуобуйаны оҥорор буолан, ыраахтан үөрэтии боппуруоһа уруккуттан турар. Ол да иһин дистанционнай ньыманан тыл олимпиадаларын ыытыыга, доруобуйаларыгар хааччахтаах оҕолору үөрэттэриини көҕүлээһиҥҥэ өрөспүүбүлүкэ инники күөҥҥэ иһэр. “Үөрэтэбит&Билэбит” ("Учим&Знаем") диэн ураты бырайыак дистанционнай үөрэх үтүө холобура буолар.
Өрөспүүбүлүкэ үөрэхтээһиҥҥэ улахан болҕомтону уруккаттан уурар. Хас биирдии оҕоҕо, төһө да ыраах нэһилиэккэ олордун, киниэхэ үөрэх бары ресурсата тиийимтиэ буолуохтаах. Ол иһин “Арктика оҕолоро”, “Арктика учууталлара” диэн бырайыактары оҥорон, Арассыыйаҕа эрэ буолбакка, аан дойду таһымыгар үөрэнэр, үлэлиир кыаҕы биэрэр туһуттан үлэлэһэ сылдьабыт. Бу бырайыактар олох-дьаһах бары эйгэтин хабан, дьон-сэргэ олорор усулуобуйатын тупсарарга туһуланаллар. Маны сэргэ дистанционнай үөрэххэ регион уратытын көрдөрөр үөрэх бырагыраамаларын бэлэмниэх тустаахпыт. Култуурабытын, тылбытын-өспүтүн, норуот быһыытынан уратыбытын учуоттуур бырагыраамалар үөрэх стандартыгар киирэллэрэ хайаан да наада. Өрөспүүбүлүкэҕэ оҕо аймах, үөрэнээччи туһанарыгар, туһалаах информацияны ыларыгар биир платформа үлэлиэхтээх. Ол өттүгэр үлэ салгыы барыаҕа.льо
Төһө да ыгым кэм үүннэр, коронавирус ыарыыны бары көмөлөөн кыайыахпыт диэн эрэнэбин. Ыксаллаах быһыыга-майгыга сыраларын-сылбаларын ууран туран үлэлиир дьоҥҥо, туора турбакка, бэйэлэрин баҕаларынан күүс-көмө буола сылдьар волонтердарга, меценаттарга, урбаанньыттарга, кырдьыктаах уонна суһал информацияны тутатына тиэрдэр иһитиннэрэр-биллэрэр эйгэ үлэһиттэригэр махталбын тиэрдэбин.
- 0
- 0
- 0
- 0
- 0
- 0