Саха Өрөспүүбүлүкэтин Ил Түмэнин билимҥэ, үөрэххэ, култуураҕа, СМИ-гэ уонна уопсастыбаннай түмсүүлэр дьыалаларыгар сис кэмитиэтин бэрэссэдээтэлэ Феодосия Габышева судаарыстыба таһымыгар фонда тэриллиэҕиттэн регионнар кыһалҕаларын болҕомтоҕо ылан, федеральнай таһымҥа тылы көмүскүүр, үөрэтэр, сайыннарар хайысхаҕа сонун ньымалары тобулар кыах үөскээбитэ регионнарга көмө, тирэх буолбутун бэлиэтээтэ.

«Фонда дойду президенэ В.В. Путин быhаччы көҕүлээhининэн тэриллибит буолан, төрөөбүт тыл сайдарыгар араас хайысхалаах үлэни ыытар. Ордук төрүт омуктар уонна аҕыйах ахсааннаах хотугу норуоттар тылларынан араас кинигэлэри, оҕолорго аналлаах көрдөрөр-иһитиннэрэр матырыйааллары таһаарыынан дьарыктанар. Ыытыллар дьаһалларга Сахабыт сирэ бары хайысханан көхтөөхтүк кытта олорор», – диэн кэпсиир Феодосия Васильевна.

Фонда үлэтин биир тутаах хайысхатынан регионнар бырайыактарын өйөөһүн буолар. Ол курдук балаҕан ыйын 16 күнүгэр диэри бары формалаах юридическай сирэйдэр бырайыак суруйан, сайаапка ыытан грант куонкуруһугар кыттыахтарын сөп. Сүрүн ирдэбил – тэрилтэ биир сылтан итэҕэһэ суох үлэлээбит буолуохтаах. Тэрийэр бөлөх сайаапкалары кумааҕыга толоруллубут көрүҥүнэн, биитэр электроннай ньыманан тутар. Аадырыстара: Москва куорат, Большой Знаменскай переулок, 1 дьиэтэ, 1 тутуута. Электроннай почтанан info@родныеязыки.рф уонна сайт нөҥүө https://родныеязыки.рф сиhилии информацияны булуоххутун сөп.

Норуот депутата, тустаах кэмитиэт салайааччыта Феодосия Габышева ыччаттарга, үөрэх уонна култуура тэрилтэлэригэр, уопсастыбаннай түмсүүлэргэ туһаайан судаарыстыбаттан бэриллэр кыаҕы толору туһанарга, сэргэх толкуйдары бырайыак ирдэбилинэн суруйан, ситэрэн-хоторон көхтөөхтүк кыттарга ыҥырда.

Бэлиэтээн эттэххэ, фонда 2018 сыллаахха дойду президенэ Владимир Путин ыйааҕынан олохтоммут. Докумуоҥҥа Арассыыйаҕа олохтоох омуктар тыллара норуот бүттүүнүн баайа, култуурунай нэһилиэстибэтэ буолара сүрүн сорук быһыытынан бэлиэтэммит. Фонданы төрүттээччилэринэн РФ просвещениеҕа министиэристибэтэ уонна Норуоттар дьыалаларыгар федеральнай агенство буолаллар. Үтүө хамсааһын ООН биллэрбит төрүт омуктар тылларын аан дойдутааҕы сылыгар саҕаламмыт.