Вячеслав Володин Саҥа дьылга уонна Ороһуоспаҕа сынньанар үгэс олохтоммута соччо ырааппатаҕын туһунан санатта.
«Сэбиэскэй кэмҥэ, 1947 сыл тохсунньу 1 күнүгэр диэри Саҥа дьылы көрсүү кэнниттэн тута үлэҕэ тахсыаллыахтааҕа. Ороһуоспа бырааһынньыга төрүт да бэлиэтэммэт этэ.

Ити үгэс 1991 сыллаахха төннүбүтэ. Кэлин, икки сылынан, 1993 сыллаахха тохсунньу 2 күнэ өрөбүл күнүнэн биллэриллибитэ. Онтон салгыы 2004 сыллаахха Үлэ кодексыгар 5 күн устата сынньанар быраабы олохтообуттара - тохсунньу 1-тан 5-гэр диэри сынньанар быраабы киллэрбиттэрэ", - диэн Дума бэрэссэдээтэлэ суруйар.
2012 сылтан бырааһынньыктааҕы өрөбүллэри 8 хонукка диэри уһатарга быһаарыы ылыныллыбыта, мантан сибээстээн өрөбүл күннэрэ 10-ча хонук устата уһатыллыбыттара. Ол да буоллар, саҥа дьыллааҕы өрөбүллэри Күөх маай бырааһынньыктарыгар көһөрөр туһунан тиһигин быспакка этиилэр киирэллэр эбэтэр букатын аккаастанар туһунан этэллэр.
Госдума спикерэ уопсастыбаттан ыйытыкка үс холобуртан биирин талалларыгар ыҥырар: хайдах баарынан өрөбүл күннэрин хаалларарга, аҕыйатарга эбэтэр сылаас кэм бириэмэтигэр көһөрөргө. Билиҥҥитэ бастакы варианы талааччы элбэх. Ыйытыкка 11,3 тыһ. тахса киһи кыттыыны ылбыта биллэр. Саҥа дьыллааҕы бырааһынньыктары оннунан хаалларар туһунан ыйытык кыттыылаахтара 58 бырыһыаннара куоластаатылар, сылаас кэмҥэ өрөбүллэри көһөрүү иһин 22 бырыһыаннара, оттон өрөбүл күннэрин аҕыйатарга 20 бырыһыаннара куоластаатылар.

Санаттахха, 2021 сыл сэтинньи 2 күнүгэр ЛДПР лидерэ Владимир Жириновскай Саҥа дьыллааҕы бырааһынньыктары сарбыйарга, дьон-сэргэ тохсунньу 2 күнүгэр үлэлии тахсалларыгар этии киллэрбитэ. Кини этиитин дойду 2022-2024 сс. бүддьүөтүн кытта сибээстээбитэ. Дьокутаат өрөбүл күннэри уларытар туһунан аан маҥнайгытын этии киллэрэр буолбатах. Кини 2020 сыллаахха ахсынньы 31 күнүттэн тохсунньу 3- гэр диэри өрөбүл күннэрин көһөрөргө, онтон атын өрөбүл хонугун уоппуска кэмигэр эбэргэ этиммитэ.

Ыйытыкка бу ссылканан киирэн кыттыаххытын сөп https://t.me/vv_volodin/266