“Барабанщица” диэн Ньурба дьонугар-сэргэтигэр киэҥник биллэр пааматынньык. Бу өйдөбүнньүгү аата-суола биллибэт скульптор 1968 сыллаахха оройуон биир саамай улахан оскуолатын тэлгэһэтигэр туруорбут. Сэбиэскэй кэмҥэ бу пааматынньык аттыгар пионер уонна хомсомуол кэккэлэригэр киллэрии курдук ыччакка үгүс долгутуулаах түгэннэр буолаллара.
Оттон 1978 сыллаахха Антонина Афанасьевна бэйэтэ пааматынньык иннигэр туран, оскуоланы бүтэрэр үөрүүлээх түгэнигэр, дириэктэр А.А. Миронов илиититтэн кыһыл көмүс мэтээли туппута. Ити курдук, “Барабанщица” дьоҥҥо-сэргэҕэ үгүс умнуллубат өйдөбүллэри хаалларбыт пааматынньык.
2019 сыллаахха Антонина Афанасьевна “Сохраним памятники” диэн бырайыак чэрчитинэн элбэх сыллар устата дьүһүнэ-бодото биллэ эргэрбит пааматынньык өрөмүөнүгэр ылсыбыта. Икки сыл буолан баран норуот дьокутаата бэйэтин үбүнэн-харчытынан пааматынньыгы чөлүгэр түһэрдэ. Саҥардыллыбыт өйдөбүнньүк хаттаан сүрэхтэниитигэр оскуола кэлэктиибэ, улуус үөрэҕин салалтатын начаалынньыга А.П. Аргунов, педагогика бэтэрээнэ А.А. Васильев, оскуоланы араас сылларга бүтэрбит выпускниктар, Ньурба куоратын олохтоохторо уо.д.а. кытыннылар.
Эһиил, 2022 сылга, Ньурба куоратын 1-кы №-дээх оскуолата 145 сыллаах үбүлүөйүн көрсөргө бэлэмнэнэр.
- 0
- 0
- 0
- 0
- 0
- 0