«Былырыын коронавирус пандемията 2020 сылга ылыныллыбыт бүддьүөккэ кэккэ уларытыылары киллэрбитэ. 2020 сыл кулун тутар, муус устар ыйдара маҥнай утаа мунаахсыппыта. Ол эрээри, РФ Бырабыыталыстыбатын кытары уонна бэйэбит испитигэр улахан бырамыысыланнай хампаанньалары кытта үчүгэйдик үлэлээн, кириисистээх 2020 сылы улахан охсуута суох таҕыстыбыт», -- диэн Майя Данилова эттэ.

Кини эппитинэн, гаас, чох уонна көмүс хостооһунун көрдөрүүтэ улаатан, дохуоттан барыс быһыытынан киирэр үп арыый үрдээбит.  «Өрөспүүбүлүкэҕэ үлэлиир 228 хампаанньа барыһыттан нолуок быһыытынан  45,1 млрд солк. киирбит. 2019 сылы кытта тэҥнээтэххэ,  37% үрдээбит», -- диэтэ.

2020 сыл түмүгүнэн өрөспүүбүлүкэ бүддьүөтүн дохуоттаах чааһыгар нолуоктан уонна атын дохуоттартан уопсайа 249,7 млрд. солк. киирбит. Барыллаан ааҕыыга сыһыаннаан 98,6% туолбут. 2019 сылы кытта тэҥнээтэххэ, дохуот киириитэ 29,7 млрд солкуобайынан улааппыт.

2020 сылга аан дойдуга пандемия бүрүүкээн, бородууксуйаларын урукку сыллар курдук сатаан атыылабаккалар,  алмаас хостуур хампаанньалар нолуоктарыттан өрөспүүбүлүкэ бүддьүөтүгэр киирэр үп кыччаабыт. 2020 сылга 7 млрд солк. курдук киирбит.

Былырыын өрөспүүбүлүкэ бүддьүөтүгэр нолуоктан буолбатах дохуоттан 9,9 млрд солк. киирбит. 2019 сылы кытта тэҥнээттэххэ, 10,9 млрд солкуобайынан кыччаабыт, ол эбэтэр 47%-нан.   

Оттон РФ бүддьүөтүттэн субсидия уонна атын төлөбүр быһыытынан киирэр үп 120,4 млрд солк. буолбут, 2019 сылы кытта тэҥнээтэххэ, 32,5 млрд солкуобайынан үрдээбит.

Майя Данилова дакылаатын Валерий Жондоров эбэн биэрдэ. Кини 2020 сылга өрөспүүбүлүкэ судаарыстыбаннай бүддьүөтүн ороскуоттаах чааһа 263,7 млрд солк. буолбутун бэлиэтээтэ. 2019 сылы кытта тэҥнээтэххэ, бу көрдөрүү 26,7 млрд солк. улааппыт.

Саха Өрөспүүбүлүкэтин баһылыгынан бигэргэммит 28 судаарыстыбаннай бырагырааманан бүддьүөт оҥоһуллубут. 2021 сыл тохсунньу ый 1 күнүнээҕи туругунан бу бырагыраамаларынан ыытыллыахтаах үп былаана 94,2% туолбут, ол эбэтэр 240,4 млрд солкуобай ороскуоттаммыт.

2020 сыллаах судаарыстыбаннай бүддьүөт туолуутун туһунан сиһилии матырыйаалы «Ил Түмэн» кэлэр нүөмэригэр ааҕарга сүбэлиибит.