Саха сирин Арктикатын 6 нэһилиэнньэлээх пууна Арассыыйа эниэргийэтин биир кэлимсэ ситимэр кыайан хапсыбат. Онон бу бөһүөлэктэри Арассыыйа Бэрэсидьиэнин “РФ 2024 сылга диэри сайдыытын сыаллара уонна соруктара” диэн ыйааҕар олоҕуран уотунан хааччыйыы үлэтэ бара турар.

Дуогабарынан бэдэрээтчиктэр күн уотуттан эниэргийэ оҥорор аныгы ыстаансыйалары, диисэл уонна аккумулятор ыстаансыйаларын туруоруохтара. Үрдүк көдьүүстээх ыстаансыйалар үлэҕэ киирдэхтэринэ, уматыгы таһарга биллэр экэниэмийэ тахсыахтаах. Ону таһынан Арктика айылҕатыгар буруонан, итиинэн дьайыы кыччыахтаах. Эспиэрдэр ааҕалларынан, уматыкка экэниэмийэ 50 % тэҥнэһиэхтээх.

Саҥа ыстаансыйалар Табалаахха (600 кВт-таах диисэл ыстаансыйата, 400 кВт-аах күн ыстаансыйата), Муомаҕа (3300 кВт-таах диисэл ыстаансыйата, 1500 кВт-таах күн ыстаансыйата), Улахан Чыыстайга (600 кВт-таах диисэл ыстаансыйата, 225 кВт-таах күн ыстаансыйата), Чуумпу Кытылга (240 кВт-таах диисэл ыстаансыйата, 99 кВт күн ыстаансыйата), Кулун Өлбүккэ (240кВт диисэл ыстаансыйата, 99 кВт күн ыстаансыйата) туруохтара.

Ыстаансыйалары туруорар үлэлэр 2021 сыл бүтүөр диэри силигин ситиэхтээхтэр. Үөһээ Дьааҥы улууһугар “Группа ЭНЭЛТ” ХЭУо уонна атын бөһүөлэктэргэ “КЭР” ХЭУо үлэлиэхтэрэ.

Инникитин РусГидро субу пилотнай бырайыак үтүө түмүктэри көрдөрдөҕүнэ, сонун уопуту Уһук Илиҥҥи федеральнай уокурук атын да муннуктарын эниэргийэнэн хааччыйыыга туттарга былааннанар.

Күн бүгүн Саха сиригэр күн уотунан үлэлиир 21 ыстаансыйа турар. Онтон саамай улахан кыамталаахтара Баатаҕайдааҕы күн ыстаансыйата буолар. Билигин дьоппуон хампаанньаларын кытта кыттыһан тыал уонна диисэл ыстаансыйатын Тиксигэ сайыннара сылдьаллар. Онно 2018 сыллаахха 900 кВт кыамталаах тыал ыстаансыйата үлэҕэ киирбитэ. 2020 сыл бүтүүтэ 3000 кВт диисэл-генератор уонна эниэргийэни хомуйааччы (накопитель энергии) оҥоһуллан бүтүөхтээхтэр.