“Саха сирин хоту өттүгэр хаһыҥнаан, балачча тымныы күн-дьыл турда. Онон сиэттэрэн, ититии болдьоҕун эрдэлэтэр сорук турар. Олорор дьиэлэргэ итиини биэрии, бастатан туран, дьон-сэргэ олорор усулуобуйатын тупсарарга туһуланар”, - диэн ОДьКХ миниистирэ Дмитрий Садовников этэр.

Санатар буоллахха, быйылгы ититии үлэлэрэ түмүктэнэн эрэллэр. Ол курдук, өрөмүөн үлэтэ 90% туолбут. Эбийиэктэргэ оттугу тиэрдии 60% буолбут.

Билиҥҥи туругунан, өрөспүүбүлүкэ Арктика оройуонугар сытар алта улууһугар ититии үлэтэ ыытыллар. Аллайыаха, Анаабыр, Булуҥ, Аллараа Халыма, Уус-Дьааҥы уонна Өлөөн улуустарыгар итиини биэрэллэр.