Саахалы туоратар биригээдэ үрдүк күүрүүлээх уот ситимин кэрийэн көрдө. Хочуолунайдарга резервнэй источниктартан уоту тута холбоотулар. Социальнай эбийиэктэргэ сарсыарда 9 чаас 47 мүнүүтэ саҕана  “Беркакит-Нагорнай” 35кВ ситимтэн ылан холбоотулар. Бөһүөлэк 3,5 тыһыынча кэриҥэ олохтооҕо хас да чаас уота суох хаала сырытта.

Беркакит бөһүөлэгин баһылыгын солбуйааччы Михаил Задверняктыын төлөпүөнүнэн сибээстэһэ сылдьыбыппар: “Бөһүөлэк 26 дьиэтигэр барытыгар уот холбонно. Бүтэһик дьиэҕэ чаас аҥаарын анараа өттүгэр уоту биэрдилэр. Бөһүөлэккэ 3,5 тыһыынча киһи олорор. Саахал кэнниттэн хочуолунайдарга тута электроэнергияны холбообуттара. Онон тоҥуу-хатыы тахсыбата”, -- диэтэ.

Саната таарыйа эттэххэ, Нерюнгри оройуонугар быйылгы кыстыкка бу иккис улахан саахал таҕыста. Ахсынньы 15 күнүн сарсыардатыгар Нерюнгри куоракка баар подстанцияҕа араарар реле алдьанан, 55 тыһыынча киһи эмиэ хас да чаас хараҥаҕа харбыалаһан хаалбыта. Уоту биэриини Нерюнгрига, Иенграҕа, Беркакикка, Золотинкаҕа, Серебрянай Борга хааччахтыы сылдьыбыттара.

Михаил Иванович этэринэн, бастакы алдьаныы содулун туораппыттарын кэнниттэн үрдүк күүрүүлээх уот ситимэ ахсынньы 25 күнүттэн саҥа схеманан үлэлии турбут. Соҕуруу ыалларбытын 40 кыраадыстаах тымныы халлаан иккиһин тургутан көрбүтүн этэҥҥэ туораатылар.