Билигин 15 тиэхиньикэлээх 148 киһи мобилизацияланан баһаар бөһүөлэккэ киирэр суолун бүөлүү сатыы сылдьаллар. Бэҕэһээ Ми-8 бөртөлүөт 60 туонна ууну куппут. Бүгүн эмиэ уу кута сылдьар. Билиҥҥитэ Таатта, Чурапчы уонна Мэҥэ Хаҥалас улуустарыттан эбии тиэхиньикэ уонна дьон кэлэ тураллар. Ону сэргэ Хаандыгаттан бэйэтиттэн минерализированнай балаһаны кэҥэтиигэ баҕалаахтары хомуйан үлэлэтэ сылдьаллар. Бу балаһаны 50 миэтирэҕэ диэри кэҥэтэр сорук турар. Ойуур баһаарын умулларааччылары аһылыгынан уонна уунан хааччыйбыттар. Кинилэр солбуйса-солбуйса сууккаҕа 24 чаас үлэлииллэр.
Саха Өрөспүүбүлүкэтин ОДьКХ-ҕа уонна энергетикаҕа миниистирэ Вячеслав Емельянов: “Бу күннэргэ халлаан туран биэрдэҕинэ, ойуур баһаара төгүрүтүллүө”, – диэн иһитиннэрдэ.
- 0
- 0
- 0
- 0
- 0
- 0