Ил Дархан Айсен Николаев «Ыраас Аартыка» экология бырайыагын сүрэхтэниитигэр кыттынна. Кини онно: «Саха сиригэр өссө Сойуус саҕаттан быраҕыллан хаалбыт бырамыысыланнай эбийиэктэр экологияҕа хормуньуну оҥороллор. Депутатскайдааҕы хайаны байытар кэмбинээккэ, Кулардааҕы көмүс хостуур баабырыкаҕа, Баатаҕайдааҕы хайаны байытар кэмбинээккэ, быраҕыллыбыт бөһүөлэктэргэ тимир бөхтөрө, быраҕыллыбыт суудунулар мунньуллубуттар. Инвентаризация ыыппыппыт түмүгэр, өрөспүүбүлүкэҕэ 437 туочукаҕа бөх буолан сытар тимирдэр бааллара биллибит. Ол онтон 84% -на Аартыка түөлбэтин улуустарыгар баар», -- диэн иһитиннэрбит.

Айсен Николаев эппитинэн, Аартыкаҕа тимир харайар пуун уонна сытар сирдэриттэн таһаарар исхиэмэ бырайыага оҥоһуллар. Билиҥҥитэ Оборона министиэристибэтин кытта бииргэ үлэлэһэр туһунан дуогабар түһэрсиллибит. Ол үлэ сүнньүнэн Булуҥ оройуона уонна коммерческэй тэрилтэ икки ардыгар улууска бөх буолан сытар тимирдэри таһаарыыга сөбүлэһии түһэрсиллибит. Маннык сөбүлэһиини Усуйаана оройуона СӨ экологиятын министиэристибэтин кытта түһэрсибит. Бырайыак толору үлэлээтэҕинэ, Саха сирин Аартыкатын улуустарыттан 100 тахса туонна тимир бөх таһаарыллара былааннанар.